Atividade

Rádiu Manu Koko Fasilita Informasaun ba Povu Atauro

Rádiu Manu Koko Fasilita Informasaun ba Povu Atauro

Atauro – atu fasilita di’ak liutan informasaun ba povu Atauro, Sekretáriu Estadu Komunikasaun Sosiál (SECOMS), Nélio Isaac Sarmento, inagura Rádiu Komunidade Manu Koko Atauro iha Sesta-Feira, 15/08/2017, iha Postu Administrativu Atauro Vila.

Iha deskursu inagurasaun Rádiu Komunidade Manu Koko, Nélio Isaac Sarmento, dehan Prezensa Rádiu Manu Koko atu fasilita informasaun ba povu Atauro, tanba ne’e, husu ba autoridade lokal sira inklui povu Atauro, atu kuidadu ba obra ne’ebé iha ona.

“Tamba ne’e hau aproveita hodi bolu atensaun ba Komunidade sira no Autoridade sira hotu katak, obra ne’ebe ita halo ne’e sidauk kompleta maibé neneik neneik too tempu ida ita sei kompleta, laós tempu ida iha hau nia mandatú maibé bele tempu tuir mai mós bele kontinua obra ida ne’e,” Nélio dehan.

Tuir SECOMS, Importante liu ba komunidade sira mak, Rádiu Manu Koko, la’os atu sai hanesan RTL, RTK, no rádiu sira seluk maibé Rádiu Manu Koko atu servi de’it komunidade Atauro liu liu ba informasaun sira ne’ebe relasaun ho sira nia atividade lorloron. SECOMS esplika katak, Rádiu Manu Koko labele husik múzika de’it maibé halo mistura oituan entre múzika ho informasaun, bele mós istoria, no fó informasaun kona-ba komunidade sira nia moris.

Inagurasaun Rádiu komunidade Atauro ne’e hetan bensaun hosi Amu Pároku Atauro, partisipa hosi Autoridade Lokal, PNTL no FDTL, Reprezentante Conselho de Imprensa inkui Funsionáriu hosi SECOMS rasik. Konsilleiru Conselho de Imprensa de Timor Leste (CI), Jose Mária Ximenes, dehan komunidade Atauro sente orgollu tamba rádiu ida ne’ebé dahuluk iha Atauro, maibé dadaun ne’e rádiu komunidade Manu Koko seidauk bele kobre hotu teritóriu Atauro nian.

“Espera katak ho rádiu komunidade Manu Koko ne’e bele fó informasaun atuál ba komunindade sira tuir sira nia hakarak”, dehan konsilleiru José. Rádiu Komunidade Manu Koko, moris iha tinan 2016, no komesa hala’o primeira teste transmisaun direita ne’e durante loron tolu hahú hosi loron 17, 18 no loron 19 fulan Fevereiru nia laran.

Administradór Postu Administrasaun Atauro, Mateus Belo, hatete rádiu ne’e ejiste komesa hosi Administradór sesante, nomós servisu maka’as hosi parte Igreja Katóliku nian, maske ho kondisaun ne’ebé mínimu maibé konsege la’o.

“Prezensa Sekertáriu Estadu iha ne’e ami sente orgullu, tamba bele fó sentidu ida mai ami Atauro, liu-liu ho prezensa rádiu komunidade nian ne’e,” Administradór Postu ne’e hatete hafoin iha nia diskursu iha Inagurasaun rádiu Manu Koko ne’e.

Tamba tuir nia, inagurasaun ba rádiu komunidade Manu Koko ne’e, pela primeira vez bele fó anin foun ida ba komunidade Atauro. Atauro difísil tebtebes iha tempu naruk nia laran liu-liu asesu ba informasaun iha rai laran nomós balun hosi rai liur hanesan mídia eletróniku no mídia seluk. “Prezensa Rádiu ne’e bele ajuda no bele tulun hodi fahe informasaun ba komunidade sira iha Atauro ne’e,” dehan Mateus Belo. *CI*