Díli – Conselho de Imprensa de Timor-Leste (CI) liuhosi Diresaun Dezenvolvimentu Análize Mídia (DDAM) hala’o akompañamentu ba prosesu tomak kobertura órgaun komunikasaun sosiál sira, iha periodu kampaña no eleisaun Parlamentár.
Liuhosi enkontru konterzia, Kuarta-Feira, 09/08 / 2017, iha RTTL.ep, Caicoli, Díli, Prezidente CI, Virgílio da Silva Guterres, verbalmente hato’o rezultadu análize CI nian ba Prezidente Konsellu Administrasaun RTTL.ep, Milena Abrantes ho nia estrutura.
Conselho de Imprensa hato’o ninia lamentasaun ba RTTL, ep (Rádiu Televizaun Timor-Leste, Imprensa Públika) tamba la hakunu públiku nia direitu atu hatene (Public’s right to know) tranzmisaun direta ba rezultadu apuramentu nasionál eleisaun parlamentár nian.
Responde ba ne’e, Prezidente Conselho Administrasaun RTTL,ep, Milena Soares Abrantes, hatete agradese ba Conselhu de Imprensa nia observasaun ba RTTL,ep nia servisu.
“Ami agradese tanba RTTL.ep hetan atensaun hosi Conselho de Imprensa atu bele asegura funsionamentu ne’ebé di’ak hosi servisu Rádiu no Televizaun nune’e bele hatan ba interese públiku di’ak liutan iha futuru,” Milena Abrantes hato’o kestaun ne’e iha enkontru ho Prezidente CI ho ninia strutura.
Maske tuir CI katak sei mosu fallansu balun iha RTTL, maibé Prezidente Konsellu Administrasaun RTTL.ep esklarese, durante prosesu eleisaun prezidensiál no parlamentar, RTTL.ep konsege oferese programa própriu balun hodi bele hato’o informasaun ba públiku.
Entretantu Prezidente CI, Virgílio da Silva Guterres, hatete rezultadu análize CI nian ne’ebé hato’o ba diretiva RTTL.ep nian laiha intensaun ida katak CI halo intervensaun ba servisu redasaun RTTL.ep nian.
Vírgilio dehan, CI nia preokupasaun ne’e hanesan mós preokupasaun públiku nian ba RTTL.ep nu’udar órgaun estadu nian atu bele serbi di’ak liutan públiku. Iha enkontru ne’ebé hala’o durante oras rua resin ne’e, CI ho RTTL.ep dikuti mós kona-ba oinsá bele estabele koperasaun entre CI ho RTTL.ep iha parte sosializasaun no programasaun ninian.