CI konsidera Lei Eleitorál Discriminativa ba Jornalista sira

CI konsidera Lei Eleitorál Discriminativa ba Jornalista sira

Atividade Hare nain: 1783

Conselho de Imprensa de Timor-Leste (CI), konsidera lei eleitoral halo diskriminasaun ba jornalísta sira tanba bele fasilita de’it jornalísta sira ne’ebé hanesan funsionáriu públiku, serbisu iha RTTL.ep no Ajénsia Tatoli de’it maka bele ezerse vota ambulante.

Liuhosi konferénsia imprensa ne’ebé realiza iha edifísiu CI, Quintal-Boot, Díli, Kinta (19/07/2017), Prezidente CI, Virgílio da Silva Guterres, triste tebes tanba tentativa hotu-hotu CI halo ho STAE, SECOMS, Estatál, no Primeiru Ministru, maibé ikus liu CI simu despaixu ida hosi gabinete Primeiru Ministru katak jornalista sira hosi mídia privada sira labele vota ambulante (vota livre) iha fatin hotu-hotu.

Prezidente CI esplika Iha artigu 37 númeru 5 lei eleitorál prevee de’it sesaun ba membru forsa armada nian, seguransa, fiskais kandidatura no funsionáriu ajente Administrasaun nian maka halo votasaun ambulante.

“iha sesaun ida ne’ebé tuir Conselho de Imprensa konsidera lei ne’e diskriminativu tanba iha karta ne’e (despaixu Primeiru Ministru) hatete katak so jornalista sira ne’ebé hanesan mós funsionáriu públiku maka bele hetan votasaun movel,” Prezidente CI esplika. Signifika katak, ema hirak ne’ebé serbisu iha RTTL.ep ho Ajénsia Tatoli la’os hanesan jornalista de’it maibé sira hanesan funsionáriu públiku ka ajente Administrasaun públika, tanba ne’e sira bele vota livre.

Tetantiva hotu CI halo liuhosi eskrita no verbal ba dirijente órgaun kompetente hanesan STAE, Estatál, SECOMS no Primeiru Ministru, maibé la konsege atinje objetivu katak jornalísta sira atu vota livre.

Prezidente CI, Virgílio Guterres iha biban konferénsia imprensa hato’o deskulpa ba diretores no xefe redasaun órgaun komunikasaun sosiál sira tanba antes ne’e iha hela prosesu eleisaun Prezidensial, CI kompromete ona katak tenta atu buka dalan ba jornalista hotu atu vota livre maibé la konsege realiza.

Prezidente CI mós husu ba xefi redasaun órgaun komunikasaun sosiál sira atu reajusta planu kobertura tuir lei hodi nune’e labele sakrifika jornalista sira ne’ebé atu ba ezerse sira nia votu iha munisípiu ne’ebé sira rejista.

Prezidente Conselho de Imprensa de Timor-Leste hatete, realidade ne’e sei sai hanesan agenda ba CI atu hala’o esforsu nune’e iha eleisaun tinan lima oin mai bele hadi’a lei ne’ebé iha atu jornalista sira tantu husi órgaun komunikasaun estadu no privadu mós iha direitu ne’ebé hanesan hodi vota movel.(CI)