Laiha Imprensa Demokrasia Mate, ParPol iha Komitmentu Hametin Conselho de Imprensa

Laiha Imprensa Demokrasia Mate, ParPol iha Komitmentu Hametin Conselho de Imprensa

Atividade Hare nain: 3678

Partidu Polítiku (ParPol) iha komitmentu boot nafatin atu hametin Conselho de Imprensa nune’e bele tau matan ba órgaun komunikasaun sosiál sira iha Timor-Leste, tanba laiha imprensa maka demokrasia mós mate.

Komitmentu ne’e hato’o hosi ParPol sira bainhira partisipa iha debate sorumutu entre imprensa ho Partidu Polítiku sira ho tema “Estadu Komunikasaun Estadu nian” iha faze daruak nian iha loron sábadu (08/07), ne’ebé transmite direita hosi GMN-TV.

Iha debate períodu daruak (08/07), mosu pergunta hosi Jornalista sira katak, polítika saída maka ParPol sira sei halo ba Conselho de Imprensa nune’e bele ajuda jornalista sira bele asesu ba karteira professional.   

Reprezentante Partidu Libertasaun Popular (PLP), Azevedo Marçal, hatete papel Gorvenu maka oinsá liuhosi Kapasitasaun sira ba Conselho de Imprensa no Jornalista sira nune’e bele sai professional liután.

“Governu tenke iha vontade atu asegura independénsia mídia,” Azevedo esplika. Nia hatutan katak Governu presiza iha kooperasaun ida di’ak ho universidade sira, nune’e bele eleva kapasidade jornalista sira nian.

Entretantu Prezidente PD, Mariano “Asanami” Sabino hatete Demokrásia moris tanba mídia, no demokrasia hanesan fíziku de’it maibé klamar maka mídia, tanba ne’e Governu tenke tau prioridade ba área komunikasaun sosiál nune’e povu Timor-Leste bele sai komunikativu liután. 

Reprezentante partidu UNDERTIM, Adolfo da Silva, hatete Governu presiza halo lei ida rigorazu liu ba ema ne’ebé impede atividade jornalista sira atu halo kobertura tanba liuhosi mídia maka povu ka públiku bele asesu informasaun ida loos no justu.

Reprezentante Partidu Republikanu (PR), Deolindo de Jesus, konsidera komunikasaun nu’udar meius ida atu ema ka grupu ida bele komunika ba malu.

Iha biban hanesan, Francisco David Carlos, Sekretáriu Jerál Partidu UDT, hatete laiha diskriminasaun ba mídia sira hotu. Governasaun ne’ebé de’it presiza apoiu nafatin serbisu mídia nian ba apoiu dezenvolvimentu iha Timor-Leste.

Reprezentante PDC, Geraldo Ximenes, hatete komunikasaun importante tebes ba sosiedade sira, Governu no instituisoens hotu-hotu nune’e bele hato’o informasaun ba malu ho loos no justu. 

Vise Prezidente Partidu MLPM, Ivo Soares da Costa, hatete mídia iha Liberdade tomak atu hala’o atividade jornalízmu ninian maibé segredu estadu nian balun mós labele atu fó sai ba públiku tanba ne’e segredu nasaun nian. Nia hatutan mídia iha liberdade maibé la’ós liberdade totalmente.

ParPol sira iha polítika ida klaru hodi asegura imprensa nune’e bele hametin no haburas liberdade imprensa iha ita nia rain ho responsabilidade. Tanba ne’e husu atu serbisu nafatin ho liberdade ne’ebé mídia sira iha atu haklaken lia loos ba povu.

Debate sorumutu entre ParPol ho Imprensa ba Segunda faze realiza iha loron sabadu, 08/07/2017, ne’ebé partisipa hosi partidu hitu (7) maka hanesan PR, UDT, PDC, MPLP, PLP, PD, UNDERTIM.

Ba terseira faze sei realiza iha loron sábadu, 15/07/2017, ne’ebé partisipa hosi partidu polítiku hitu (7) hanesan PUDD, PTD, FM, PSD, CASDT, PDN no FRETILIN.

Antes ne’e debate primeira faze realiza ona iha loron sábadu, 01/07/2017,  ne’ebé partisipa hosi partidu neen (6) hanesan APMT, KHUNTO, PEP, PST, PDP, CNRT, no Bloku Unidade Popular (BUP).

Programa sorumutu entre Partidu Polítiku no Imprensa ne’e ho tema “Estadu Komunikasaun Estadu nian” realiza hosi GMN, liuhosi kooperasaun entre Conselho de Imprensa de Timor-Leste no UNDP, ne’ebé hetan suporta hosi Governu Japaun. (CI)