Atividade

CI, GMN-TV no UNDP Realiza Primeira Faze Sorumutu Partidu Polítiku ho Imprensa

CI, GMN-TV no UNDP Realiza Primeira Faze Sorumutu Partidu Polítiku ho Imprensa

Conselho de Imprensa de Timor-Leste (CI) serbisu hamutuk ho Grupu Mídia Nasionál (GMN-TV) no Organizasaun Nosoens Unidas ba Programa Dezenvolvimentu (UNDP) ne’ebé hetan tulun hosi povu Japaun, realiza primeira faze  programa Political Parties Meet The Press ka Sorumutu Partidus Polítikus ho Imprensa.

Sorumutu primeira faze entre partidus polítikus ho imprensa ne’e realiza iha loron sábadu, 1/07/2017, liuhosi transmisaun direita iha GMN-TV durante oras rua (2) hosi tuku 8:30 to’o 10:30 kalan ne’ebé hetan partisipasaun hosi partidu neen (6) mak hanesan APMT, KHUNTO, PEP, PST, PDP, CNRT, no Bloku Unidade Popular (BUP).

Iha biban ne’e mós hetan partisipasaun hosi mídia nasionál no internasionál sira maka hanesan Timor Post, STL, Independente, Timoroman, GMN, Matadalan, Time Timor, Rádiu Liberdade, Rádiu Komunidade Comoro, Rádiu Metro,  Ajensia Tatoli, Tafara.org, Kyodo News.

Programa “Sorumutu Partidus Polítikus ho Imprensa” atu fó espasu b aba mídia sira iha asesu hanesan ba informasaun hosi partidu polítiku sira no mós loke espasu hanesan ba partidu polítiku sira atu fahe informasaun ba mídia sira. 

Liuhosi sorumutu ne’ebé hetan transmisaun direta ba públiku bele ajuda ona sosiedade sira atu hetan informasaun hanesan no direita hosi partidu polítiku sira liuhosi kanál mídia sira.
Iha introdusaun, Prezidente CI, Virgílio da Silva Guterres hanesan mós moderadór ba sorumutu ne’e dehan sorumutu ne’e importante tebes atu mídia sira kobre informasaun hosi partidu polítiku sira nune’e bele hato’o ba públiku ho loos no balansu. 

“Tema debate kona-ba estadu komunikasaun estadu ninian, katak estadu nia komunikasaun ho ninia sidadaun sira di’ak ka lae? Sé partidu sira hetan fiar hosi eleitores sira hosi povu atu ukun, oinsá maka sira bele mantein komunikasaun di’ak ho sidadaun sira,” Prezidente CI, Virgílio da Silva Guterres hato’o kestaun ne’e iha biban sorumutu Partidu Polítiku ho jornalista, editor no diretor mídia sira, iha GMN, Sábadu, 01/07/2017.

Prezidente Ci hatutan polítika sira nia planu ba estabelese komunikasaun di’ak ho instuitusaun sira, garante mós komunikasaun atu bele sai ponte de komunikasaun ho sidadaun no ukun nain sira.

Durante oras rua (2), jornalista sira kestiona maka’as liu kona-ba oinsá partidu polítiku sira kaer ukun sei fó prioridade saída ba seitór komunikasaun sosiál Timor-Leste. Levanta mós kestaun seluk kona-ba oinsá bele resolve problema dezempregu estruturál ne’ebé oras ne’e akontese iha ita nia rain.

Iha parte seluk, mídia sira mós kestiona maka’as kona-ba komitmentu partidu polítiku sira nian ba luta hasoru korrupsaun tanba to’o oras ne’e seidauk iha lei anti korrupsaun. 

Jornalista sira mós husu atu governasaun foun mai atu halo lakon tiha birokrasia ne’ebé oras ne’e difikulta tebes atividade jornalizmu ninian hodi asesu ba dokumentus hotu estadu ne’e nian.
Hatan ba preokupasaun hirak ne’e, partidu polítiku sira ne’ebé partisipa iha sorumutu primeira faze kompromitidu atu hadi’a no hametin liutan kestaun sira ne’ebé jornalista sira foti.

Bainhira kaer ukun, Partidu polítiku sira sei fó atensaun másima ba serbisu jornalizmu nian, fó Liberdade tomak ba mídia sira atu halo serbisu ho profisionál maibé tenke ho responsabilidade hodi labele kontra kódigu konduta jornalizmu nian ne’ebé estabele ona. 

Sorumutu entre partidu polítiku sira ho imprensa, hala’o ba faze tolu (3) hanesan primeira faze iha loron sábadu, 01/07/2017, ne’ebé partisipa hosi partidu neen (6) hanesan APMT, KHUNTO, PEP, PST, PDP, CNRT, no Bloku Unidade Popular (BUP).

Segunda faze sei realiza iha loron sábadu, 08/07/2017, ne’ebé partisipa hosi partidu hitu (7) maka hanesan PR, UDT, PDC, MPLP, PLP, PD, UNDERTIM. Terseira faze partisipa hosi partidu hitu (7) hanesan PUDD, PTD, FM, PSD, CASDT, PDN no FRETILIN. 

Programa ne’e realiza tanba serbisu hamutuk entre CI, UNDP no GMNT-TV no halo tranzmisaun direita hosi GMN-TV durante oras rua hosi 8:30 to’o 10:30. (CI)