Conselho de Imprensa de Timor-Leste (CI) hamutuk ho Partidu Polítiku (ParPol) sira liuhosi enkontru preparativu iha salaun fundasaun oriente, 23/06/2017, partidu sira dada ona númeru sorteiu hodi partisipa iha programa sorumutu ho imprensa (Political Parties Meet The Press).
Iha sorteiu ne’e, partidu polítiku fahe ba grupu tolu (3) ne’ebé sei partisipa iha programa Political Parties Meet The Press tuir faze tolu (3) hanesan primeira faze sei hala’o iha loron 1/07/2017, segundu faze iha loron 08/07/2017 no terseiru faze iha loron 15/07/2017.
Faze tolu (3) ne’e, kada grupu iha partidu hitu (7) maka hanesan primeira faze kompostu hosi BUP, AMPT, KHUNTO, PEP, PST, PDP, CNRT. Segundu faze kompostu hosi PR, UDT, PDC, MPLP, PLP, PD, UNDERTIM. Terseiru faze kompostu hosi PUDD, PTD, FM, PSD, CASDT, PDN no FRETILIN.
Iha intervensau Prezidente CI, Virgílio da Silva Guterres hatete programa political parties meet the press hakarak loke espasu ba jornalísta sira atu hasoru partidu polítiku sira atu husu saída de’it kona-ba polítika no programa partidu nian.
Prezidente CI esplika programa political parties meet the press mós ajuda partidu polítiku sira atu bele fa’an produtu (programa) partidu nian atu bele povu bele desidi iha eleisaun parlamentar hodi ba kaer ukun.
Iha biban hanesan Prezidente CI, Virgílio Guterres hato’o agradese wa’in ba partidu polítiku sira nia kolaborasaun di’ak hodi partisipa iha prosesu tomak ba preparasaun programa sorumutu entre ParPol no mídia sira.
Conselho de Imprensa de Timor-Leste nu’udar entidade administrativa independente ida ne’ebé hala’o ninia atribuisaun no kompeténsia iha área komunikasaun sosiál sem submete ba diresaun ka orientasaun sira hosi poder polítiku nian. (CI)