Iha loron daruak treinamentu kona-ba “Reportajen Krítiku, Justu, Balansu Iha Eleisaun Parlamentar 2017”, foka ba xefi Redasaun no Editór mídia sira.
Iha Abertura, Prezidente Conselho de Imprensa de Timor-Leste, Virgílio da Silva Guterres informa katak, “treinamentu ne’e koopera ho UNDP, liuliu unidade ida Boa Governasaun ninian, liuliu ba eleisaun ninian, deside atu halo atividade ne’ebé maka hanesan briefing ida ba Jornalísta sira no a Xefi Editór sira, molok tama ba halo kobertura kampaña”.
Prezidente Conselho de Imprensa de Timor-Leste, hatutan katak, “mídia hatene prinsípiu jerál sira maibé tanba tempu naruk, eleisaun tinan lima dala ida, entaun fó hanoin fila-fali saída-saída maka ita tenke kumpre iha kolesaun dadus, faktu, iha kampu e mós saída-saída maka ita presiza konsidera iha salaun redasaun atu halo, hakerek, edit, mai atu deside tun ka la tun iha notísia”.
“Iha ne’e Komponente rua, ne’ebé loron primeiru (19/06/2017) Conselho Imprensa deside, jornalísta sira ne’ebé barak liu tun ba kampu atu rekolla dadus halo notísia no ba ohin (20/06/2017), ho xefe redasaun editór sira iha salaun redasaun atu simu Jornalísta sira nia notísia mai hosi kampu atu edit, atu hare, atu cek, konfirma ona ka lae, verifika ona ka lae, molok atu haruka ba konsellu redasaun atu hatún,” esklarese Prezidente Conselho de Imprensa de Timor-Leste.
“Ida ne’e objetivu Conselho Imprensa ninian, Conselho Imprensa kontente hetan fasilitadór ida ne’ebé alein de iha istória rasik iha mundu Jornalízmu nian, nia mós iha esperiénsia barak ne’ebé relasiona ho Timor,” ramata Prezidente Conselho de Imprensa de Timor-Leste.
Reprezentante UNDP, Yuichi Ishida mós agradese tanba bele apoia mídia sira iha tempu eleisaun, “ami kontente ita boot sira hotu bele hola parte iha treinamentu ba kobertura eleisaun nian, kontente mós bele apoiu Jornalísta sira iha Timor-Leste tanba Jornalísta sira maka iha papél importante atu kria dame no eleisaun ida ne’ebé justu, apoia ne’e hetan hosi Governu Japaun, ami fiar katak bele fó benefísiu ba ita boot sira”.
Treinamentu loron daruak, partisipa hosi chefe Redasaun no Editór na’in 22, nafatin fasilita hosi Fasilitadór Internasionál, Nezar Patria no Fasilitadór Nasional hosi UNDP, Tito Filipe.
Materia hirak ne’ebé haktuir iha treinamentu loron daruak ne’e foka ba Polítika no Jestaun Editoriál iha Períodu Eleisaun, Independénsia Polítika Editoriál, Prosedimentu Eleitorál no Étika Jornalizmu no Prinsípiu Universál Jornalízmu. (CI)