CI Sei Lori Jornalista sira Hasoru ParPol Molok Eleisaun Parlamentár

CI Sei Lori Jornalista sira Hasoru ParPol Molok Eleisaun Parlamentár

Atividade Hare nain: 4774

Conselho de Imprensa de Timor-Leste (CI) sei lori Jornalista sira hasoru lideransa Partidu Polítiku sira (ParPol) liuhosi programa “Political Parties Meet the Press” ho objetivu atu mídia sira bele hatene liután programa no polítika kada partidu ninian hodi públika ba públiku molok eleisaun parlamentár.

Diretora Ezekutiva Conselho de Imprensa de Timor-Leste, Dra. Ana Tersa Sequeira Hatete liuhosi programa political parties meet the press, partidu polítiku sira sei hetan oportunidade hanesan hodi hato’o ba mídia sira kona-ba partidu nia programa nune’e bele ajuda mídia sira hodi halo publikasaun ida di’ak liután.

“Programa ne’e ami bolu dehan political parties meet the press. Ida ne’e ami hakarak loke espasu ba jornalísta sira atu hasoru partidu polítiku sira atu husu saida de’it kona-ba polítika no programa partidu nian,” Diretora Ezekutivu Ana Teresa Sequeira hato’o lia hirak ne’e bainhira enkontru entre CNE, CAC, CI, RTTL.ep, PDHJ, PNTL ho partidu polítiku sira iha salaun CNE, Sesta-Feira, 09/06/2017.

Alien de mídia sira sei hasoru partidu polítiku, Diretora dehan CI mós sei halo monitorizasaun ba produtu jornalístiku nia publikasaun durante kampaña to’o eleisaun ramata iha festa demokrasia tinan ida ne’e.

Iha análize produtu jornalítiku refere, CI sei foka liu ba oinsá mídia sira fó oportunidade ne’ebé hanesan ba partidu polítiku sira ka lae, inklui mós tau matan ba produtu jornalístiku sira nune’e labele viola kódigu Étika Jornalítiku.

Diretora ne’e esplika, bazeia ba esperiénsia iha eleisaun prezidensiál, maka departamentu análize mídia CI nian nota katak, kandidatu sira ne’ebé maka ho rekursu ki’ik, figura ne’ebé ema ladún koñese, sira nia kapasidade mobiliza masa ladún maka’as, ladún hetan kobertura natoon hosi mídia sira.

“Entaun ami nia papél atu hare asuntu ne’e durante periodu kampaña to’o eleisaun, mídia sira fó porsaun hanesan ka lae ba partidu polítiku sira,” Diretora esplika publikasaun notísia la’os hare ba partidu ne’e boot ka ki’ik, maibé sira presiza hetan balansu kobertura hosi mídia sira hotu. (CI)