Jornalísta 20 Resin Tuir Formasaun Kona-ba Kobertura Eleisaun

Jornalísta 20 Resin Tuir Formasaun Kona-ba Kobertura Eleisaun

Atividade Hare nain: 2245

Treinamentu Mídia no Eleisaun ho tema “Kontribui ba Hasa’e Partisipasaun iha Eleisaun Ida ne’ebé Moos no Justu”, hala’o iha salaun formasaun Sekretária Estadu Joventude no Desportu (SEJD), Díli, Segunda-Feira, 12/06/2017. Partisipantes hirak ne’e hosi Jornalísta foun Mídia Online Tafara.org no Jornalísta Rádiu Komunidade sira.

Diretór Mídia Online Tafara.org, Fernando Costa, iha nia intervensaun haktuir matéria iha formasaun ne’e maka hanesan, oinsa hakerek notísia, jornalízmu dame no seluk tan. “Durante loron hat (4) sei hetan matéria kona-ba straight news, jornalízmu dame no gender sensitive jornalízmu.”

Diretór Tafara mós espera katak, partisipantes sira bele aprende ho di’ak, atu oinsa bele hakerek notísia ne’ebé di’ak no lais.

Treinamentu ne’e loke hosi Asesór Gabineti Primeiru Minístru ba asuntu Sosiedade Sivíl,  Joaquin Freitas. Iha ninia palestra, Joaquin Freitas apela ba partisipantes sira tenke uza oportunidade treinamentu ne’e ho di’ak hodi gaña esperiénsia.

Hafoin Abertura, Diretora Ezekutiva Conselho de Imprensa de Timor-Leste, Ana Teresa Sequeira, halo aprezentasaun matéria sobre, “Kobertura Eleisaun” no mós foka ba rezultadu análize hosi Diresaun Análize Mídia Conselho de Imprensa no mós oinsá halo kobertura ne’ebé di’ak no balansu durante períodu eleisaun Parlamentár, hodi motiva partisipantes sira haklean sira nia koñesimentu kona-ba serbisu iha mídia.

Alein de ne’e, Diretora Ezekutiva ne’e mós, enkoraja Jornalísta foun sira atu la ta’uk koko asuntu foun iha mundu jurnalísmu, durante la hakat liu kode étika jornalízmu nian.

Diretora Ezekutiva Conselho Imprensa mós introdús sobre knaar no misaun Conselho de Imprensa ba partisipantes sira iha nia aprezentasaun ne’e.

Treinamentu ba Jornalísta foun no Jornalísta Rádiu Komunidade ne’e, realiza hosi Mídia Online Tafara.org no hetan suporta hosi Gabinete Primeiru Minístru Ba Asuntu Sosiedade Sivíl. (CI)