Tribunal Distritál Dili Absolve Jornalista Raimundo Oki No Lorenco Vicente Martins

Tribunal Distritál Dili Absolve Jornalista Raimundo Oki No Lorenco Vicente Martins

Atividade Hare nain: 5477

Tribunal Distritál Dili, Kinta Feira semana ne’e, deside absolve Jornalista Timor Post, Raimundo Oki no Eis Diretór Timor Post, Lorenco Vicente Martins, hasoru Eis Asesór Ministériu Finansas, Rui Maria de Araujo, liu husi julgamentu ne’ebé preside husi Juiz Singular, Patrosíniu Antonino.

Tribunal Distritál Dili, absolve kajú ne’e tanba Ministériu Públiku no lezadu Rui Maria de Araujo la aprezenta faktu sufisiente hodi kondena Jornalista Timor Post, Raimundo Oki no Eis Diretór Timor Post Lorenco Vicente Martins. Tribunal mos konsidera akuzasaun Ministériu Públiku la prense elementu krime denunzia koloniza, tuir artigu 285 kódigu penal.

Hafoin rona desizaun Tribunal Distritál Dili,  Jornalista Timor Post, Raimundo Oki, hato’o ba mídia sira katak kasu ne’e laos ba nia pessoal maibé bele sai lisaun ba jornalista sira seluk. “Kaju ida ne’e, Laos ba ha’u personal de’it, mas bele mós sai referénsia ba maluk Jornalista sira hotu iha Timor katak wainhira hakarak hakerek kona-ba buat ruma ne’ebé mak sensitiveu, tenke konfirma malu ho di’ak entre Jornalista ho Editor, labele haketak sala.”

Raimundu Oki, fo nafatin korajen ba jornalista sira atu barani halao sira ninia knar. “Lalika ta’uk, jornalista mak ta’uk ona, públiku sira ne’ebé mak loron kalan halerik kona ba problema sosial sira atu ba ne’ebé, tanba públiku hotu hotu fiar katak Jornalista ne’e matan tilun públiku nian, agora konfiansa públiku tau iha ita nia kaba’as, se ita ta’uk, se mak sei lori sira nia todan ne’e?” motiva Oki.

Oki mós hatutan katak esperiénsia ne’e sei la hamate nia iha hakerek. “La signifika katak ha’u para ona iha ne’e, sei kontinua nafatin, mas ne’e mós lisaun ida para aban ka bainrua mak ha’u hakerek tan notisia ida, ha’u tenke prepara an didi’ak, ha’u tenke le fila fila, para depois fo sai ba públiku karik labele hakanek ema ruma nia laran, ne’e sinál di’ak ida ba ita katak ita tenke kuidadu liután.” 

Eis Diretór Timor Post, Lorenco Vicente Martins, mós haktuir katak ho esperiénsia ida ne’e fo atensaun ba Jornalista no mídia hotu atu ke’e kle’an informasaun molok publika atu la hetan tan esperiénsia hanesan.