Conselho de Imprensa de Timor-Leste (CI) ho Prokuradoria Jerál da Repúblika (PJR) sein serbisu hamutuk hodi garantia serbisu jornalizmu nian iha Timor-Leste (TL).
Komitmentu ne’e hato’o hosi Prokuradoria Jerál Repúblika, Jose Ximenes hamutuk ho Adjunta Prokuradora Zélia Trindade, hafoin ramata sorumutu ho Prezidente Conselho de Imprensa ho ninia estrutura, iha salaun enkontru PJR , Colmera, Díli, Segunda, 29 / 05 / 2017.
Jose Ximenes esplika katak, enkontru ne’e ko’alia kona-ba oinsá instituisaun Estadu rua (2) ne’e serbisu hamutuk liu hosi asina nota entendimentu nune’e bele garantia liberdade imprensa no liberdade espresaun iha Timor – Leste.
“Objetivu prinsipál hosi enkontru ne’e maka oinsá prokuradoria Jerál Repúblika hamutuk ho Conselho de Imprensa bele tau ideia hamutuk bele hare prespetiva balun kooperasaun entre Conselho de Imprensa ninian no Prokuradoria Jerál da Repúblika ninia. Asuntu prinsipál ne’ebé ita hare maka kona-ba informasaun no posibilidade formasaun ba jornalísta no autór judisiáriu sira,’’ Jose esplika.
Iha biban hanesan, Prezidente Conselho de Imprensa, Virgílio da Silva Guterres, hateten enkontru ne’e nu’udár kontinuasaun hosi primeira konferénsia internasionál ne’ebé CI hala’o iha Delta-Nova Díli, iha fulan Maio tinan ne’e.
“Enkontru ida ne’e follow up hosi komunikasaun ne’ebé Conselho de Imprensa hala’o ho instituisaun sira seluk durante konferénsia internasionál ne’ebé Conselho de Imprensa hala’o iha loron 9 no fulan 10 fulan Maiu liu ba, atu buka posibilidade kooperasaun entre instituisaun estadu ne’ebé barak liu iha sira nia serbisu ne’e troka informasaun. Objetivu komun ne’e maka oinsá atu hamutuk garantia liberdade imprensa e espresaun,” Prezidente CI esplika.
Virgílio da Silva Guterres akresente, kooperasaun hirak ne’e importante hodi bele iha koordenasaun di’ak entre membru instituisaun Estadu ho jornalísta sira iha kampu, bainhira hala’o ida – idak ninia knaar tuir lei.
Iha enkontru ne’e ko’alia kona-ba oinsá CI no PGR bele serbisu hamutuk nune’e bele rezolve kazu ne’ebé jornalísta ka mídia sira infrenta, direitu ba resposta, sosializasaun knaar CI no Ministériu Públiku inklui asuntu relevante seluk.
Iha biban ne’e, Prezidente CI entrega Kartilla Jornalísta no relatóriu anuál CI ba Adjunta PGR, Zélia Trindade, enkuantu Prokuradór Jerál Repúblika entrega relatóriu anuál no balansu serbisu anuál PJR hahú tinan 2013 – 2017 ba Prezidente CI. (*)