Jornalísta Timoroan hosi mídia eletrónika, imprimi no online inklui assosiasaun mídia iha Timor-Leste, Segunda-Feira, 29/05/2017, hala’o asaun solidariedade ba kazu jornalísta Timor Post Raimundu Oky no Eis Diretór Timor Post, Lorenço Vicente Martins, hasoru eis asesor Ministerio Financas, atual Primeiru Minístru, Rui Maria de Araujo.
Sekretáriu Jerál Asosiasaun Jornalísta Press Union, Manuel Pinto, hatete asaun ne’e nu’udár demostra solidariedade ida ba kazu Jornalísta Timor Post Raimundo Oky nia públikasaun ne’ebé sei rona desizaun ikus hosi Tribunál Distritál Díli (TDD), iha loron 1 fulan Juñu tinan ne’e.
“Ita halo asaun protesta tanba ita konsiente katak jornalísta ne’e pillar ida ne’ebé maka atu dudu demokrásia. Tanba ne’e maka iha TL foin ukun-án tinan 15 maka akontese kazu sira hanesan ne’e, ami asosiasaun Jornalísta sente katak ita hahú tama ona iha tentative atu hamate liberdade imprensa,” Sekretáriu Jerál Asosiasaun Jornalísta Press Union, Manuel Pinto hato’o kestaun ne’e iha Palásiu Governu nia oin hafoin ramata hala’o asaun protesta.
Manuel esplika sedu ka tarde, liberdade imprensa sei mate iha nasaun ida demokrátiku hanesan Timor-Leste, tanba kazu Jornalísta Oky nian, Tribunal la uza lei komuniksaun sosiál ne’ebé maka promove no defende liberdade imprensa iha Timor-Leste.
Sekjen Press Union ne’e dehan asosiasaun jornalista sira sei la interven desizaun saída de’it maka tribunal sei foti maibé sira nafatin konsidera katak aktus sira ne’ebé lori Jornalísta ba Tribunal ne’e sei hamate liberdade imprensa.
“Timor-Leste sedu ka tarde, sé ita la kontra asaun ka hahalok sira hanesan ne’e maka loron ida liberdade imprensa mate totál iha TL no demokrásia ne’ebé maka ita hakarak sei la akontese hanesan saída maka ita hakarak,” Manuel salienta.
Asosiaun jornalísta sira sei akonpaña kazu jornalísta Raimundo Oky to’o hetan desizaun final. Manuel dehan bainhira tribunal hatun ona desizaun maka sei fó loron 15 ba vítima no Ministériu Públiku atu halo rekursu.
Iha fatin hanesan, Jornalísta Raimundo Oky lamenta tebes ba tribunal tanba la uja lei komunikasaun sosiál hodi halo julgamentu ba nia kazu maibé uza fali kódigu penál.
“Ita hakarak utiliza lei komunikasaun sosiál ne’ebé maka iha tiha ona, ita hakarak ida ne’e de’it. Labele uja lei kódigu penal hodi kriminalija tanba Jornalísta la’os kriminozu, jornalísta la’os oho ema,” Raimundo Oky dehan.
Nia enkoraja jornalísta Timoroan sira hotu katak labele tauk maibé tenke kuidadu ho públikasaun sira. Ba futuru tenke jornalísta sira tenke hare didi’ak kona-ba balansu molok halo públiksaun.
Oky dehan jornalísta sira tenke kuidadu liutan tanba ho nia kazu ne’ebé akontese ona maka ba futuru ema hotu fasilmente lori jornalísta ba tribunál. (CI)