Timor - Leste Media Development Centre TLMDC, servisu hamutuk ho ONG OPAC husi Japaun, Peace Centre ho Radio RAKAMBIA, organiza treinamentu ba jornalista, foka ba kobertura eleisaun.
Konselheru CI, Hugo Maria Fernandes, ne’ebé halo aprezentasaun durante treinamentu iha salaun Treinamentu TLMDC, Hudi Laran - Dili, loron 24/5/2017 ne’e informa katak, “Conselho de Imprensa simu konvite husi TLMDC atu halo treinamentu ba jornalista Radio Komunidade, mai hato’o informasaun kona ba oinsá mak halo kobertura iha períodu antes eleisaun, períodu eleisaun no depois de eleisaun.”
Konselheru Hugo hatutan katak, “ninia objectivo mak oinsá maka Jornalista sira hasees an husi buat ida bias, tenke imparsiál, tenke independente iha sira nia kobertura sira ne’e.”
Diretór TLMDC, Francisco da Silva Gari , informa mós sobre objectivo treinamentu katak, “atu hasa’e koñesimentu jornalista sira, liuliu atu halo kobertura ne’ebé balansu no imparsiál ba eleisaun Parlamentar tuir mai ne’e.”
“Atu bele fo espasu ba Jornalista sira atu bele aumenta liután sira nia programa iha radio sira atu bele fó informasaun klaru ba ita nia komunidade sira atu sira bele ativu liu iha eleisaun Parlamentar mai ne’e,: esplika Diretór TLMDC. Atividade ne’e ho tematiku “Treinamentu Hodi Haforsa Polítiku Jornalismu ba Jornalista Radio Komunidade,”
Partisipa iha treinamentu ne’e hamutuk jornalista nain sanulu kompostu husi jornalista husi Radio Komunidade Komoro – Dili nain hat inklui jornalista husi Radio Komunidade Manatuto, Liquiçá no Radio Komunidade Aileu hamutuk ema nain nen.