Atividade

Responsável Máximu Conselho Imprensa Indonézia ka Ketua Dewan Pers Indonézia, Orgullu Tanba Simu Kondekorasaun Hosi Estadu Timor-Leste

Responsável Máximu Conselho Imprensa Indonézia ka Ketua Dewan Pers Indonézia, Orgullu Tanba Simu Kondekorasaun Hosi Estadu Timor-Leste

Ketua Dewan Pers Indonézia, Yosep Adi Prasetyio, simu kondekorasaun Medailla Órden Timor-Leste hosi Prezidenti Repúblika Timor-Leste, Taur Matan Ruak, Kinta 17/5/2017, iha Palásiu Prezidensiál, Aitarak-Laran, Díli.
Yosep Ady Prasetyo, esplika katak, kondekorasaun ne’ebé sira simu nu’udár apresiasaun ida ba atividade profesionalizmu no eroizmu iha tempu rejisténsia.

“Ha’u nia vijita mai Timor-Leste ne’e, tanba hetan konvida hosi staff prezidensiál relasiona ho kondekorasaun ne’ebé entrega hosi Estadu Timor-Leste, kondekorasaun ne’e hato’o tanba konsidera ami oferta ba Timor-Leste, foka ba tempu bainhira molok ukun rasik-án,” esplika ativista ne’e.

Yosep Ady Prasetyo, haktuir katak kondekorasaun ne’e hanesan motivasaun forte ba ativista hotu atu kontinua priénse era ukun-án hodi kontribui ba dezenvolvimentu nasaun.
 “Ohin Prezidente Taur Matan Ruak rasik hatete katak kestaun dadauk ne’e la’os kestaun ukun rasik-án tan, maibé oinsa priénse ukun-án ne’e ho dezenvolvimentu, ho prósperu, ho hare ba direitus umanus,” dehan Yosep Adi Prasetyo.

Eis ativista ne’e mós, hato’o nia sentimentu agradesementu wa’in bele hetan medailla ne’e.

“Sente tristi, ha’u nunka hakarak kuandu saída mak ha’u halo ne’e, tempu ruma hetan kondekorasaun no onestu de’it, ha’u tristi tanba loron ne’e ha’u hare mós família sira ne’ebé kolega aktivista sira seluk husik hela,” subliña Stanley.

Iha oportunidade hanesan, Ketua Dewan Pers Indonézia ne’e mós vijita edifísiu Conselho de Imprensa Timor - Leste, hodi hasoru malu ho Prezidente Conselho de Imprensa de Timor-Leste, Virgílio da Silva Guterres, hodi ko’alia sobre relasaun serbisu agora no ba futuru mai.

“Ha’u nu’udár ketua Dewan Pers, ha’u nia kolega ho Ketua Dewan Pers Timor Leste, Prezidente Conselho de Imprensa de Timor-Leste, ami senti ami iha kakesik ida, iha kakesik morál, mai ita dezenvolve ita nia nasaun rua, se bele, mai, ita kompete dezenvolve, kuandu balu hakat neneik, bele dada hosi ida ne’e maka dezenvolvidu liu ona.”

Alen ne’e, eis ativista ho naran kodiku Stanley ne’e, vijita mos Muzeum Rezisténsia e Jardim dos Herois Metinaro-Díli. (CI)