Dili, 16/05 - Liuhosi Konferensia Internasionál kona-ba Promove Liberdade Imprensa no Liberdade Espresaun iha rejiaun Sudeste Aziátiku no Pasífiku ne’ebé realiza hosi Conselho de Imprensa de Timor-Leste iha ámbitu tinan ida CI nian, Prezidente da Repúblika (PR), Taur Matan Ruak konfesa katak CI bele hadi’a kondisaun jornalísta sira nomós haloos atividade jornalísmu nian.
“Ha’u nia konviksaun no espetativa katak, dezenvolvimentu aktividade CI nian bele kontribui esesivamente atu hadi’a kondisaun jornalísta sira nian no haloos sira nia atividade di’ak liutan iha tempu oin mai, hodi bele kontribui mós atu promove atmosfera favorável ida hodi hala’o independensia imprensa nian ho rigor tuir lia loos ne’ebé jornalísta sira hala’o,” PR Taur Matan Ruak hato’o ninia fiar ne’e iha nia diskursu enseramentu konferensia internasionál, Delta Nova, Kuarta, 10/05/2017.
Taur valoriza importansia hosi papél jornalísta nian ne’ebe fundamental tebtebes mak kontribui ona ba Timor-Leste nudar nasaun ida nia dezenvolvimentu durante tinan 15 nia laran. Nia enfaze katak esforsu tomak hirak ne’e konta mos ho Prezidente da Repúblika, Governu, orgaun estadu nian tomak ho esforsu tomak hodi valoriza, dignifika, prestizia papel jornalísta sira iha nasaun ida ne’e
CI organiza Semináriu Internasionál durante loron rua (2), 09-10/05/2017, iha Salaun Delta Nova, ho tema Jeral “Promove Liberdade Imprensa no Liberdade Espresaun iha reziaun Suduéste Aziátiku no Pasífiku” ho sub tema “Papel Conselho de Imprensa ba Sosiedade demokrátiku ida.”
konferensia internasional ne’ebe Conselho de Imprensa organiza hodi selebra CI nia aniversariu ba dahuluk, PR Taur Matan Ruak uza mos iha oportunidade ne’e hato’o ninia parabens ba orgaun reguladora media nian iha Timor-Leste ne’e.
“Transmite ha’u nia votus serbisu di’ak ba kornalísta sira iha Timor Leste nomos boa susesu ba Conselho de Imprensa Timor-Leste iha aplikasaun ninia programa barak ne’ebé sei halo iha tempu oin mai,” TMR esplika
PR Taur Matan Ruak mos hato’o agredese wa’in ba jornalísta sira hotu inklui mídia tomak iha Timor-Leste ne’ebé durante ne’e halo ona kobertura ba aktividade TMR nian durante mandatu tinan lima (5). Nia sauda no agradese ba Conselho de Imprensa de Timor-Leste tanba bele konvida ona nia hodi partisipa iha konferensia internasionál kona-ba Conselho de Imprensa nia kna’ar iha sosiedade demokrátiku.
.