Prezidente Parlamentu Nasionál (PN), Adérito da Costa Hugo, apresia serbisu Conselho de Imprensa (CI) nian durante tinan ida (1) tanba CI bele ona halo akompañamentu produtividade orgaun komunikasaun sosiál sira.
“Ha’u hare relatóriu balun ita boot sira nian, Ha’u kontenti teb-tebes tanba komesa iha ona orgaun ida (CI) halo ona akompañamentu produtividade profisionalízmu komunikasaun jornaís no televizaun ninian.”
Prezidente Parlamentu Nasionál, Adérito da Costa Hugo, hato’o kestaun ne’e iha sala serbisu edifísiu PN, Kuarta, 12 Maiu 2017, bainhira hala’o enkontru ho komitiva hosi orgaun reguladora mídia komunikasaun sosiál iha Timor-Leste ne’e.
Komitiva ne’e xefia hosi Prezidente CI, Virgílio da Silva Guterres, konsilleiru Jose Maria Ximenes no Francisco Simōes Belo no Diretora Ezekutiva Ana Sequeira.
Adérito mós agradese teb-tebes ba CI tanba bele halo serbisu ho di’ak. Nia esplika terseira lejislatura nia kontribuisaun maka kria ona lei komunikasaun sosiál nune’e saída de’it maka sei halo ne’e konta ho Parlamentu Nasionál.
Iha enkontru kortejia ne’e Prezidente CI, Virgílio Guterres mós informa katak iha tempu besik CI sei submete ninia relatóriu anuál ba Parlamentu Nasionál nu’udár lei komunikasaun sosiál no estatutu Conselho de Imprensa hateten ona.
Hatan ba ida ne’e Prezidente PN Adérito Hugo dehan bainhira relatóriu Anuál CI nian tama ona iha PN maka sei loke sesaun ida ba CI atu halo aprezentasaun no hetan apresiasaun hosi deputadu sira, iha Parlamentu Nasionál.
Prezidente PN esklare ninia orgullu boot ba Timor-Leste ne’ebe maka avansa teb-tebes iha sudieste aziátiku entermus de Liberdade Imprensa no Liberdade Espresaun. Nia hein katak Timor-Leste nia avansu ida ne’e kontinua la’o iha nível rezionál no mós internasionál konta ho kontribuisaun hosi Conselho de Imprensa. (*)