Conselho de Imprensa (CI) ho the United Nations Development Programme (UNDP), liuhosi sorumutu iha salaun plenária CI, iha Quintal-Boot, Díli, Sesta-Feira, 10/03/2017, deskute posibilidade atu estabelese kooperasaun iha tempu eleisaun prezidensiál no parlamentár.
Prezidente CI, Virgílio da Silva Guterres hatete, UNDP haree ba CI nia intervensaun iha formasaun no semináriu ba públiku kona-ba prosesu eleitorál no liberdade imprensa ninian maka UNDP ko’alia ho CI hodi buka atividade ruma ne’ebé bele halo hamutuk iha periódu eleisaun ninian liuhosi projetu UNDP nian ne’ebé hanaran projetu eleitorál.
“Hosi Ami (CI) propoin atividade balun, ida, formasaun ba jornalísta sira kona-ba prosedimentu eleitorál tanba ne’e la’os kona de’it ba kobertura, lae, Prosedimentu. Jornalísta sira presiza hatene prosedimentu eleitóral hosi rejistu to’o kontazen de votus ne’e ita presiza hatene Formasaun ne’e la’os de’it ba jornalísta sira maibé ba sefi redasaun no editór sira.”
“Atividade seluk ne’ebé ami propoin atu halo maka organiza debate entre partidu sira (Political parties Meet the press) ne’ebé involve barak liu mídia, jornalísta sira. Jornalísta sira hosi mídia hotuhotu mai hato’o perguntas no eventu ne’e transmite liuhosi rádiiu no televizaun ba públiku,” Prezidente CI dehan.
Alein formasaun no debate. Prezidente CI dehan UNDP mós prontu atu halo imprimi ba dokumentu kódiku étika jornalístika hanesan brosure ida bele fahe ba públika. UNDP mós sei deskuti atu bele ajuda ka lae iha selebrasaun aniversáriu dahuluk CI nian ne’ebé monu iha loron 10 fulan Maiu tinan ida-ne’e.
Ativista RENETIL ne’e apresia vizita UNDP nian ne’ebé iha duni interese atu koopera ho CI hodi halo aktividade ruma. “Hein katak ami konkorda ona, semana oin ami tenke aprova ona termu de referensia,” Nia.
Iha biban ne’e, Asesór Tékniku ba Projetu Eleitorál-UNDP, Andres del Castillo Sanches hatete eleisaun prezidensiál besik dadauk ona, UNDP sei fó de’it apoiu ki’ik oan hanesan halo produsaun brosura kódigu étika jornalísta ho versaun lian tetun no portugés.
“Eleisoens parlamentáres ita hakarak esplora posiblidades ba programa hamutuk ba treinamentu kona-ba prosesu eleitorál, esplika lei eleitorais,” Adrens esplika.
Asesór dehan CI hatene prosesu tomak jornalísta nian no UNDP hatene prosesu eleitorál, tanba ne’e UNDP bele ajuda esplika ba jornalísta sira kona-ba prosesu eleitorál, leis no formula nomeasaun asentu iha parlamentu nasionál.
Iha tempu badak, CI ho UNDP sei tur hamutuk hodi deskute no trasa termu referensia (TOR) hodi kria programa, nune’e bele diskute iha CI no mós UNDP hodi estabelese serbisu hamutuk ba prosesu eleisaun ninian.
Conselho de Imprensa nu’udar entidade administrativa independente, harii iha loron 10 Maiu 2016 ho misaun atu promove liberdade espresaun no Liberdade imprensa iha Timor-Leste. (*)