CI Hala’o Mídiasaun ba Kazu Plajíu
DILI 10/02 – Iha Tersa loron 7 Fevereiru 2017 Conselho de Imprensa (CI) loke audensia ba mídia online olatimornews no hallo.tl hodi rona no halo mídiasaun ba kazu plagiarismu ne’ebe involve mídia rua ne’e. Ne’e mídiasaun dahuluk nian desde CI simu mandatu servisu iha Maio 2016.
Audensia ne’e prezide hosi Prezidente Virgilio da Silva Guterres no tuir mai mídia hosi konselleru Paulo Adriano da Crus Araujo ne’ebe iha esperiensia ba area juridiku no hetan akompana hosi konselleru Jose Maria Ximenes, Hugo Maria Fernandes, no Francisco Simões Belo. Marka mos prezensa Diretóra Ezekutiva CI, Diretór Analiza Mídia no Monitorizasaun no staff tenkniku juridiku nian.
Akuzasaun ba hahalok komete plagiarismu ne’e hato’o mai CI iha loron 18 de Janeiru 2017 husi olatimornews hasoru hallo.tl. Kronolojia keixa ne’e haktuir katak iha loron 19 Outobru 2016 olatimornews publika ninia notisia ho titlu Timor oan 570 positivu HIV/SIDA, nain 65 mate ona. Iha loron rua tuir mai, loron 21 Outobru 2017 notisia hanesan publika fali hosi hallo.tl ho konteudu no foto ne’ebe hanesan lolos no la temi fontes notisia.Maski iha mudansa oituan ba titlu maibe foto hatudu lolos na’in hosi produtu jornalistiku ne’e tanba iha marka.
Diretór olatimornews prova notisia ne’e produtu sira nian. “Tanba iha Timor copy write seidauk iha entaun ami tau iha foto ne’e marka kabur ho ondas, ida ne’e atu hatudu katak sasan sira ne’e ami nian.” Dehan Jordão Henrique.
CI iha kompetensia tuir Lei No, 5/2014 artigu 44 letra (g) atu sai árbitru, mídiador no resolve problema sira ne’ebé mosu tanba atividade jornalista nian. Kompetensia ne’e mos hatur iha dekretu lei No.25/2015 kriasaun Conselho de Imprensa no ninia estatuto artigu 45 kona-ba kompetensia CI nian atu halo mídiasaun. Iha mídiasaun ne’e konselleiru Paulo Araujo afirma kona-ba objetivu hosi audensia ne’e ba parte rua.
“CI hakarak atu ajuda jornalista sira atu oinsa hala’o sira nia serbisu ho profesional. Audensia ida ne’e atu buka oinsa jornalista sira bele komprende sira nia knar diak liu tan.”
Marka mos prezensa iha mídiasaun ne’e Xefe Redasaun olatimornews Alexandre Asis, Diretóra hallo.tl Pham Hong Thanh ho ninia jornalista.
Iha mídiasaun ne’e jornalista hallo.tl deskobre kona-ba plagia ne’ebe nia halo ona tanba ninia koinesmentu no esperiensia ne’ebe seidauk nataton iha profisaun ida ne’e.
Durante audensia CI nota katak mídia enternainamentu sira koko atu halo mos funsaun mídia sosial nian hanesan halo produtu jornalistiku maibe laiha lisensa no jornalista sira simu kontratasaun dobru. Tanba ne’e Konselleru Hugo Fernandes fo sujestaun atu hatur lolos buat hirak ne’e iha fatin