DILI-Conselho de Imprensa estabelese kooperasaun ho Insituto Nasional Administrasaun Publiku (INAP) hodi fo formasaun ba staff Conselho Imprensa nain 13 iha area administrasaun no jestaun eskritoriu.
Formasaun ne’e halao tiha ona ne’e durante loron 10, hahu hosi loron 8 to’o loron 21 fulan Novembru, tinan ne’e. Directóra Rekursu Humanu Conselho de Imprensa, Ligia Vieira Amaral, esplika katak, formasaun ne’e atu hadia servisu funsionarios nian iha area administrasaun no jestaun eskritoriu, tanba funsionarios ne’ebé Conselho de Imprensa rekruta balun foun tebes.
“Formasaun ne’e realiza tanba atu hadia servisu administrasaun, jestaun eskritoriu funsionarius nian no haforsa servisu iha Conselho de Imprensa nian sai diak liu tan,” hateten Ligia Vieira Amaral, iha nia knar fatin, Conselho Imprensa, Segunda (12/12/2016).
Ligia Viera Amaral mos partisipa ativu iha formasaun ne’e hodi halo observasaun no konsidera formasaun ne’e relevantes, liu-liu bele hetan esperensia kmanek husi formador INAP ne’ebé iha esperensia ona.
Nia fo sasin katak, rejultadu formasaun ne’e positivu tebes, tanba staff sira pratika duni iha servisu administrasaun no hadia jestaun eskritoriu iha Conselho de Imprensa.
Ho esperensia ne’e, Ligia Veira Amaral fiar katak ba futuru sei kontinua tan formasaun ba staff sira husi diresaun Dezenvolvimentu Análiza Mídia no Diresaun Apoiu Jurídiku no Liberdade Imprensa, ne’ebé la konsege partisipa iha formasaun dahuluk. (CI)