Delegasaun Conselho de Imprensa Timor-Leste  foto hamutuk ho membru Australian Press Counsil
Delegasaun Conselho de Imprensa Timor-Leste foto hamutuk ho membru Australian Press Counsil

CI-APC Sei harii Monumentu Balibo Five

Atividade Hare nain: 1113

SYDNEY–Fo valorizasaun ba jornalista nain 5 ne’ebe mate iha Balibo wainhira halao aktividade jornalistika hodi halo kobertura ba invazaun Indonesia mai teritoriu Timor-Leste iha 1975, Conselho de Imprensa Timor-Leste (CI-TL) ho Australian Press Council (APC) iha ona ideia atu harii monumentu Balibo Five no estabelese muzeu ida ba servisu media nian.

Ideia atu harii monumentu ne’e aprezenta husi Prezidenti CI, Virgilio da Silva Guterres wainhira halo vizita trabalho ba Australian Press Council (APC) iha Sydney-Australia, loron 15 fulan Novenbru 2016, wainhira hasoru malu ho Prof. David Weisbrot AM, nudar chair APC.

APC apresia no hatudu sira nia prontidaun atu apoiu Conselho de Imprensa, ba hari’i monumentu no muzeu refere, nune’e mos apoiu ba dezenvolve hamutuk mídia, promove liberdade imprensa no espresaun iha Timor-Leste.

Kompromisu APC nian afirma diretamente husi Prof. David Weisbrot AM ba delegasaun Timor-Leste ne’ebé kompostu husi husi Prezidenti Virgilio da Silva Guterres, ho membru sira hanesan Jose Maria Ximenes, Paulo da Cruz Araujo, Hugo Maria Fernandes, Francisco Belo Simôes da Costa no Diretora Ezekutiva Ana Teresa Sequeira. 

Iha enkontru ne’e prezidenti CI  mos aprezenta tan ideia balun atu  loke komunikasaun ho APC atu iha futuru bele servisu hamutuk, promove liberdade imprensa no hakerek istoria kona-ba involvementu no sakrifisu jornalista sira nian durante invazaun to’o faze independensia.

Ideia ne’e hetan apresiasaun boot husi autoridadi sira APC nian, no sira husu atu formula didiak kooperasaun iha futuru entre instituisaun rua ne’e, introdus ideia ne’e iha asaun konkreta. CI mos aproveita oportunidade ne’e, hodi introdus lei komunikasaun social husi Membru CI, Paulo da Cruz Araujo.

CI Timor-Leste nia papel importante atu responde ba keixas nian, tanba ba oin sei fo oportunidade diak atu rezolve keixas ne’ebe kontra jornalista ka publikasaun media nian tuir dalan mediasaun duke liu hosi tribunal no kaer ba processo penal nian hanessan Denuncia Caluniosa (pasal pemfitnaan) ne’ebe akontese dadauk. Ne’e mekanismu alternativo ida ne’ebe resolve keixas sedu no bele efektivu liu ba parte hotu-hotu.”

Biban hanesan Nangle, Director of Complaints APC informa APC prontu ajuda no loke komunikasaun ho CI atu elabora nesesidadi balun ne’ebe CI presiza husi APC, hanesan fornese materia kona-ba ajudikasaun no halo planu estratejia, inklui simu funsionariu CI nian halo estudu komparativu iha APC. ** CI **