Conselho de Imprensa Retifika ona Karta ba Tempo Timor

Conselho de Imprensa halo ona klarifikasaun no retifikasaun ba sala redasionál ne’ebé mosu iha surat Conselho de Imprensa númeru ref: 326/PR-CI/VI/2019 ho asuntu Infrasaun Hasoru Kode Étika Jornalístika, iha data 28 juñu ne’ebé haruka ba Xefe Redasaun Tempo Timor, Sr. Teodorico da Costa no kopia ba diretór Tempo Timor, Sr. José Antonio Belo.

Conselho de Imprensa rekoñese sala redasionál ne’ebé mosu iha parágrafu dahuluk iha surat ne’ebé antes ne’e haruka on aba Tempo Timor. Loloos ne’e Conselho de Imprensa hakarak temi “notísia Tempo Timor, edisaun 22 Juñu 2019 ho títlu : Parabens AMP ba Promesa Falsu Tinan Ida” la’ós “notísia Televizaun Timor-Leste (TVTL), edisaun kalan 18 juñu 2019”. Ba sala redasionál ida ne’e, Conselho de Imprensa hato’o deskulpa ba redasaun Tempo Timor.

Conselho de Imprensa mós hakarak hato’o agradese wa’in ba jornalista Tempo Timor, Raimundus Oki, nia informasaun ne’ebé hato’o ba CI liuhosi kanál komunikasaun professional.

CI mós hakarak klarifika katak Surat CI nian ho númeru referénsia: 326/PR-CI/VI/2019 haruka duni ba xefe redasaun Tempo Timor, Sr. Teodorico da Costa. No rezultadu análize CI nian iha surat laran kona duni ba notísia Tempo Timor nian. Nune’e Conselho de Imprensa haruka hikas karta ne’ebé hadi’a tiha ona ba Tempo Timor.

Hosi mídia sosiál, CI nota katak, Tempo Timor halo ona deseminasaun ba CI nia surat ho númeru referénsia: 326/PR-CI/VI/2019. Ho diseminasaun ne’e hatudu katak, Tempo Timor konsidera surat ne’e enderesadu duni ba Tempo Timor, no nia análize mós kona duni ba notísia Tempo Timor nian.

Ba konsiderasaun no esforsu atu desemina rezultadu análize konteudu hosi Conselho de Imprensa no direitu resposta hosi sidadaun sira iha pájina publikasaun Tempo Timor, Conselho de Imprensa hato’o agradese wa’in. 

CI konsidera ida ne’e hanesan hahalok ezemplar ne’ebé meius komunikasaun hotu-hotu iha Timor-Leste tenke haktuir, tanba nu’udar parte integral husi prátika professional étika jornalízmu nian. (CI)  



Imprimir   Email