Dili, Timor-Leste – 3 Augustu 2018 – Conselho de Imprensa Timor-Leste (CI) preukupa ho situasaun empase polítika iha railaran. Impase polítika dadauk ne’e afeita tebes vida setór hotu-hotu iha país ne’e, tantu setór públiku ka setór privadu.
Durante Konferensia Imprensa ne’ebé hala’o iha edefisiu CI, Sesta (3/8), Prezidente CI, Virgílio da Silva Guterres hateten political deadlock ne’e ekonomikamente implika mós ba funsionamentu kanál mídia sira nia publikasaun iha railaran.
Situasaun ne’e sai aat-liu tan mak jornál balu tenke hemenus númeru jornalista husi sira nia serbisu. Situasaun seluk, jornalista sira Diáriu Timor Roman tenke lakon sira nia serbisu tamba jornál ne’e taka ona temporariamente tamba laiha osan atu selu nia jornalista sira, Prezidente CI ne’e haktuir.
“Faktu impíriku hatudu katak kompaña iha railaran barak mak depende ba projetu setor públiku nian, ho liafuan seluk kompaña barak mak depende ba projetu governu nian. Entau, bainhira instabilidade polítika akontese, laiha orsamentu estadu nian mak aloka ba projetu hirak ne’e, klaramente ida-ne’e efeita direta ba kresimentu ekonómiku kompaña sira nian,” dehan nia.
Prezidente CI ne’e mós salenta, situasaun ne’e mós fó impaktu boot ba kompaña mída sira tamba instituisaun Estadu nian barak mak seidauk selu sira nia jornál.
“Iha parte seluk, tinan barak nia laran kuaze kanál mídia hotu-hotu depende mkaas ba publisidade instituisaun governu nian. Ho situasaun ida-ne’e governu la tau ona sira nia publisidade ka iklan iha kanál mídia sira iha railaran. Konsekuensia husi situasaun ekonómika ne’e mak rendimentu kanál mídia sira ne’e tu’un (drop),” nia esplika.
Eis Prezidente AJTL ne’e hatutan, CI dadauk ne’e buka dalan hamutuk ho diretór no mídia-nain sira atu buka solusaun, nune’e situasaun ekonómika ne’e labele kontinua afeita no implika funsionamentu kanál mídia nian, liu-liu ba bein star jornalista ho nia familia sira.