Introdusaun


La kleur tan Timor-Leste tama ba kampãna Eleisaun Antisipada ba parlamentu nasionál. Ita hotu hatene katak iha kontestante 8 ne’ebé kompostu husi partidu politiku 4 no koligasaun 4. Tanba ne’e Conselho de Imprensa hein katak eventu ne’e, hahu hosi kampãna to’o apuramentu de votus sei sai diak bainhira iha kontribuisaun diak husi jornalistas sira, meius komunikasaun sosiál, orgaun komunikasaun sosiál, partidu polítiku no orgaun kompetente ba eleisaun hanesan CNE, STAE no MAET, no parte seguransa hanesan PNTL.  

Nune’e, liuhosi komunikadu imprensa ida ne’e Conselho de Imprensa husu ba:

1.    Jornalista sira
    Kontinua kaer metin Kode Étika Jornalístika hodi mantein independensia editorial.
    Respeitu prosedimentu eleitoral nian.

2.    Meius Komunikasaun Sosiál
    Fo tratamentu justu no imparsial ba kontestante bloku no partidu politiku sira.
    Garante direitu antena ba kontestante sira hotu atu públiku bele hetan informasaun ho loloos no momoos.
    Prevene publikasaun ne’ebé iha tendensia atu hamosu defamasaun ba parte seluk.

3.    Orgaun Komunikasaun Sosiál
    Garante kondisaun favoravel no saudavel ba ninia jornalista sira atu halo kobertura ho didiak.
    Responsabiliza ba movimentu seguru jornalista sira nian atu halo kobertura.
    Halo ekilibru iha publisidade politika redasaun nian.

4.    Kontestante sira
    Uza Meiu Komunikasaun Sosiál ho edukativu, konstrutivu, saudavel atu hato’o programa duke halo akuzasaun.
    Fo asesu ba jornalista sira no garante siguransa ba sira durante periodu eleisaun.
    Labele uza imprensa hodi provoka no hamanas situasaun durante periodu eleisaun.

5.    Orgaun Eleitoral no instituisaun relevante sira (CNE, STAE, MAET, PNTL)
    Garante asesu ba jornalista sira atu iha espasu atu hetan informasaun ne’ebé sira tenki hetan atu hodi hato’o ba publiku.
    Fo asesu no garante siguransa ba jornalista sira hodi halo kobertura ho didiak.

6.    Públiku
    Buka esplora konkorente bloku no partidu politiku sira nia programa, vizaun-misaun kona-ba governu nian atu serve ba sira hodi halo desizaun tuir konsiensia.


Virgílio da Silva Guterres
Prezidente


Imprimir   Email