Rejistu Karteira Profesional Adia ba Loron 26 Fulan Outubro 2017

Rejistu Karteira Profesional Adia ba Loron 26 Fulan Outubro 2017

Hare nain: 1789

DILI (20/10), Relasiona ho karta deklarasaun hosi instituisaun balun ne’ebé seidauk fo ba jornalista Nasionál sira hodi hetan karteira professional, ne’ebe lolos hahu rejistu iha Conselho de Imprensa no remata iha loron 20/10/2017 ne’e, Conselho de Imprensa adia ba loron 26/10/2017 ho rajaun tamba iha jornalista balun ne’ebe to’o agora sei problema ho mídia nain konaba deklarasaun ne’e.

Asuntu ne’e hatoo hosi Prezidente Conselho de Imprensa (CI), Virgílio  da Silva Guterres, akompainha hosi Diretora Ezekutiva, Ana Teresa Sequeira, hamutuk ho Diretór Analiza Mídia, Alberico da Costa Junior, no Diretór Diresaun Kooperasaun I Produsaun Mídia, Altino da Cruz Freitas liu hosi Konferensia Imprensa ne’ebe halao iha Banku Mundial, hafoin Telekonferensia.

Ho problema ne’e, Prezidente Conselho de Imprensa apela ba orgaun Komunikasaun Sosial ka Mídia nain sira atu fasilita prosesu ida ne’e liu-liu fasilita maluk jornalista sira ne’ebe ke sira nia kareira ne’e iha tempu balun sira serbisu iha orgaun komunikasaun sosiál sira atu fasilita ida ne’e.

“ karik jornalista balun serbisu iha ona iha Mídia seluk maibe atu komprova sira nia dokumentus sira ne’e, sira tenki hetan deklarasaun ruma hosi Mídia sira ne’ebe sira serbisu iha tinan kotuk ba iha tinan rua liu ba, hau hanoin iha obrigasaun ba orgaun komunikasaun atu rekoiñese katak ema hanesan ne’e serbisu duni iha fatin ida ne’e hahu hosi tinan ida ne’e to’o tinan ida ne’e, ” dehan Prezidente CI.

Virgílio  da Silva Guterres reforsa katak, jornalista balun husi Mídia komunikasaun balun mídia nain balun la aseita atu fo karta deklarasaun ne’e tamba sira muda ona ba serbisu iha fatin seluk, inklui mos RTTL.ep mos esplika katak sira labele fo deklarasaun ne’e, maibe hosi CI rasik buka hela atu esplika ba sira katak intensaun ne’e laos atu Mídia idak idak mak atu fo akreditasaun ba ema idak idak maibe realidade katak uluk ema barak serbisu iha Radio Televizaun ne’ebe agora serbisu iha fatin seluk.

“ Hanesan mos ema barak uluk serbisu iha Timor Post no agora serbisu iha fatin seluk, entaun atu kompleta sira nia deklarasaun katak sira serbisu tinan lima, ida ne’e konta hotu ho buat sira ne’e, katak tinan ida iha STL, tinan ida iha Timor Post, RTTL,EP, ikus liu serbisu iha GMN, entaun atu kompleta sira nia dokumentus ne’e pelumenus iha komprovativu katak los duni ga lae uluk nia serbisu iha fatin sira ne’e,” nia esplika.

Nune’e Prezidente CI dehan ho ida ne’e mak mídia sira seluk ne’ebe uluk sira serbisu ba ne’e tenki buka atu fasilita jornalista sira ne’e. 

“ lalika barak liu, dokumentus kiik oan ida katak los duni ema hanesan ne’e uluk serbisu duni iha fatin ida ne’e, hanesan editor, hanesan jornalista, hanesan kameraman, ida ne’e deit”, dehan prezidente.

tuir dadus ne’ebe Conselho Imprensa liu hosi Diresaun Analiza Mídia simu katak, total Jornalista ne’ebe mai rejistu ona iha Conselho de Imprensa hodi hetan Karteira Profesional hamutuk ema 140 resin ona. *CI