Conselho de Imprensa sei Atribui Karteira Profesionál ba Jornalista Sira

Conselho de Imprensa sei Atribui Karteira Profesionál ba Jornalista Sira

Hare nain: 1895

 

Dili, 22 Setembru 2017 – Conselho de Imprensa Timor-Leste (CI) sei atribui karteira profesionál ba jornalista sira ne’ebé hala’o knaar jornalizmu durante tinan lima ba leten. Tuir planu, CI mós sei atribui karta jornalista ónorariu ba ema sira ne’ebé durante ne’e kontribui ona ba atividade jornalístika no liberdade imprensa iha railaran.

Prezidente Coselho de Imprensa, Virgilio da Silva Guterres hateten katak Conselho de Imprensa loke ona rejistu ba jornalista sira iha loron 22 fulan Setembru to loron 20 fulan Outubru 2017. Conselho de Imprensa halo ona prosesu no prepara kritériu ne’ebé sei aplika ba jornalista sira ne’ebé merese atu hetan títulu jornalista profesionál.

“Hakarak bolu jornalista sira hotu ne’ebe iha ona esperiensia tinan lima ba leten iha aria jornalismu atu bele mai foti aplikasaun no kompleta rekizitus sira atu hodi bele hetan karteira profesionál. Atribuisaun ba karteira ne’e fó ba jornalista sira, bázea ba Lei Komunikasaun sosiál, Artigu 13 kona-ba titulu profesionál no kompetensia ne’ebé lei ne’e fó ba Conselho de Imprensa,” dehan Prezidente Virgilio da Silva Guterres.

Báze legál ne’ebé fó komptensia ba CI atu atribui karteira presfionál ba jornalista sira mak Lei Nú 5/2014 loron 19 Novembru Lei Komunikasaun Sosiál, Artigu 13 no regulamentu nú 6/2017, 21 Abril, Artigu 3 kona-ba títulu profesionál.

Kritériu ba aplikasaun karteira profesionál ne’e mak 1). Prenxe karta aplikasaun (prepara hosi CI); 2). Kópia dokumentu identifikasaun nian; 3), Fotografia koloridu ne’ebé foin hasai; 4). Deklarasaun, ho kompromisu de onra, katak laiha konflitu ruma tuir temi nanis ona iha Lei Komunikasaun Sosiál no husi ne’ebé obriga atu halo tuir dever legál no étika sira ne’ebé iha ligasaun ba profisaun (prepara hosi CI); 5). Dokumentu ne’ebé prova hala’o profisaun hanesan okupasaun prinsipál, permanente no hetan remunerasaun, ne’ebé hasai husi entidade ne’ebé fó servisu.

Conselho de Imprensa mos sei atribui kartaun jornalista ónorariu ba ema hirak ne’ebé konsidera nu’udar sesepuh mídia nian ka sira ne’ebé durante ne’e defende serbisu mídia nian ba liberdade imprensa iha railaran hodi kontribui ba demokrasia. Atribuisaun karta ónorariu jornalista ne’e sei fó bázea ba deliberasaun Conselho de Imprensa nian.

Conselho de Imprensa nu’udar entidade administrativa independente ida no hala’o ninia atribuisaun no kompetensia ne’ebé la submete ba diresaun ka orientasaun sira husi podér politíka nian. CI nia misaun prinsipál mak atu promove liberdade espresaun no liberdade imprensa iha railaran.