Biban ida ne’e, Conselho de Imprensa (CI) Timor-Leste hakarak hato’o apresiasaun boot ba serbisu autór judisiáiru sira nian iha Tribunal Distritál Díli (TDD), ne’ebé hala’o sira nia knaar ho profisionál tebes hodi tetu no hola desizaun finál ba kazu Timor Post ho lezadu Rui Maria de Araujo, atuál Primeiru Ministru Timor-Leste.
Liu hosi audénsia julgamentu finál iha Tribunal Distrital Díli (TDD), Kinta lorokraik (1/6/2017), tuku 17:00 OTL, Juis Ivan Gonçalves, hakotu desizaun hodi absolve argidu Raimundo Oki nu’udár jornalísta Timor Post ho Lourenço Martins, eis Diretór Timor Post, hosi alegasaun Ministériu Públiku (MP) nian kona-ba “Denunçia Caluniosa” tanba Produz no públika notísias iha jornál Timor Post hodi hatete, Asesór Ministériu Finansa, Rui Maria de Araujo, atuál Primeiru Ministru fó projetu ba kompaña ida hosi Indonézia.
Iha audensia julgamentu, foin lalais ne’e, Ministériu Públiku (MP) halo akuzasaun finál ba arguidu Raimundo Oki ho arguidu Lourenço Martins, ho pena prizaun tinan 2 efetivu ba arguidu Raimundo Oki no pena tinan ida no suspensaun tinan 3 ba arguidu Lourenço Martins.
Conselho de Imprensa (CI) apresia tebes desizaun finál Tribunal Primeira Instánsia nian ba kazu Timor Post nian ne’e, tanba tau konsiderasaun boot ba Lei Komunikasaun Sosiál no rona duni pareser hosi Conselho de Imprensa nian atu desizaun hotu ne’ebé kabe ba serbisus jornalístiku nian presiza konfirma mós ba lei Kominkasaun Sosiál no Kode Étiku Jornalístika nian ne’ebé Conselho de Imprensa aprova tiha ona.
Iha sorin seluk, Conselho de Imprensa hare lisaun ruma ne’ebé mak foti hosi prosesu ida ne’e katak Conselho de Imprensa kontinua respeita prosesu sira tribunál nian maibé prosesu ne’e sai ona nota negativu ida ba Timor-Leste nia esforsu ba liberdade imprensa iha reziaun AZIA. Ida ne’e mós loke dalan ba polítiku nain sira atu lori jornalista sira ba tribunal maski defamasaun iha lei, la’os ona krime.
Ikus liu, Conselho Imprensa husu ba jornalísta sira hotu no mós mídia nain atu kontinua hala’o serbisu jornalístika nian hodi kaer metin ba Lei Komunikasaun Sosiál no Kode Étika Jornalístika ne’ebé Conselho de Imprensa aprova tiha ona.
“Ita hotu hamutuk asegura no promove Liberdade Imprensa no Liberdade Espresaun ho responsabilidade iha ámbitu demokrasia nia laran,” hateten Prezidente Conselho de Imprensa (CI), Virgílio da Silva Guterres.