Loron 3 fulan Maiu hanesan loron Mundiál Liberdade Imprensa. Conselho de Imprensa Timor-Leste (CI) komemora loron ne’e liuhosi konferénsia imprensa, CI louva jornalísta Timoroan tomak ne’ebé hakna’ar án iha mundu jornalízmu no husu ba mídia na’in sira atu tau matan ba kondisaun jornalísta nian.
“Conselho de Imprensa husu atu mídia na’in sira tau mós atensaun ba vida jornalísta sira nian katak ita hakarak jornalísta ne’ebé professional no iha kualidade, ita mós tenke tau atensaun oinsá kapasita ita nia jornalísta entermus de koñesimentu no nesesidade moris,” Konsilleiru Francisco Ximões Belo hato’o kestaun ne’e liuhosi konferénsia imprensa iha CI, Quintal Boot, Díli, 03/05/2017.
Konsilleiru Francisco dehan tuir CI nia hare kapasidade jornalísta sira sei naton hela entermus de koñesimentu, tanba ne’e presiza iha treinamentu no vizita serbisu barak liutan. Nia hatutan presiza hare fila fali kontratu jornalísta sira nian ne’ebé regula sira nia profisaun hodi trata sira hanesan jornalista profesionál.
Consilleiru Francisco, hatutan Conselho de Imprensa fó apresiasaun tomak ba Estadu no órgaun hotu-hotu iha rai ida ne’e ne’ebé halo esforsu makas hodi hatuur Timor-Leste nu’udár nasaun ki’ik maibé nian Liberdade imprensa di’ak liu iha Ásia Pasífiku.
Iha biban hanesan Prezidente Interinu CI, Konsilleiru Jose M. Ximenes, apela ba lider no membru instituisaun Estadu atu respeita papél mídia nian atu asesu ba informasaun no husu ba orgaun estadu atu dezenvolve nafatin mídia iha Timor-Leste.
“Conselho de Imprensa iha preokupasaun balun hakarak hato’o hanesan preokupa ba atividade jornalísta hanesan violénsia halo hasoru jornalísta sira. Ida ne’e CI preokupa tebtebes, nune’e mós halo tratamentu ne’eb’e justu ba jornalísta sira atu asesu ba informasaun,” Prezidente Interinu CI, Konsilleiru Jose M. Ximenes dehan.
Conselho de Imprensa nu’udár entidade administrativa independente ida no hala’o ninia atribuisaun no kompetensia ne’ebé la submete ba diresaun ka orientasaun sira husi podér politíka nian. CI nia misaun prinsipál maka atu promove liberdade espresaun no liberdade imprensa iha railaran. (CI)