Conselho de Imprensa Husu Públiku no Entidade Estadu tomak atu Respeitu Knaar Jornalísta nian iha Prosesu Harii Demokrasia

Conselho de Imprensa Husu Públiku no Entidade Estadu tomak atu Respeitu Knaar Jornalísta nian iha Prosesu Harii Demokrasia

Hare nain: 870

Dili, Timor-Leste - 3 Maiu 2017 – Relasiona ho komemorasaun Loron Mundiál Liberdade Imprensa ne’ebé monu iha Kuarta (3/5) tinan ida-ne’e, Conselho de Imprensa Timor-Leste (CI) husu públiku no entidade tomak Estadu nian atu respeitu atividade jornalistíka hotu-hotu ne’ebé kanál mídia no jornalísta sira hala’o hodi hametin prosesu harii Estadu direitu no demokrasia iha railaran.

Prezidente Interinu Conselho de Imprensa, Jose M. Ximenes, liuhusi komunikadu imprensa kondena makaas aktu violentu no hahalok diskriminativu sira ne’ebé ajente sira estadu nian balu komete hasoru kanál mídia no jornalísta sira ikus-ikus ne’e. Tuir nia, violénsia no diskriminasaun hasoru jornalísta nu’udár hahalok aat ne’ebé terinetik sidadaun sira nia direitu atu asesu ba informasaun kona-ba atividade sira ne’ebé entidade sira estadu nia hala’o.

“Husu ba entidade hotu atu respeita atividade jornalizmu hotu hato’o informasaun ba públiku,” Prezidente Interinu CI haktuir.

Eis Prezidente Sindicato Jornalísta Timor Leste (SJTL) ne’e esplika, iha nasaun demokrátiku ida hanesan Timor-Leste, jornalísta iha podér tomak atu hala’o ninia funsaun sosiál hodi kontrola atividade saída de’it mak instituisaun Estadu no Governu hala’o tanba Konstituisaun RDTL garante jornalísta sira nia knaar hodi hakonu públiku nia direitu ba informasaun.

Eis diretór Timor Post ne’e afirma, entidade sira Estadu nian loloos tenke konsiente katak Timor-Leste mós ratifika ona kuaze konvensaun internasionál sanulu [10] kona-ba direitu sivil polítika, signifika entidade Estadu nian tenke nakloke-an atu públiku bele kontrola sira liuhusi atividade jornalístiku ne’ebé jornalísta sira hala’o.

Conselho de Imprensa rejista ona kazu violensia hasoru jornalísta Timoroan rua, kazu diskriminasaun hasoru jornalísta nain rua no kazu amesa hasoru jornalísta ida. Conselho de Imprensa dadauk ne’e halo esforsu atu sosializa Lei Komunikasaun Sosiál ba públiku no entidade sira Estadu nian atu kompriende-liu tan papel mídia iha prosesu harii demokrásia iha railaran.

Conselho de Imprensa nu’udár entidade administrativa independente ida no hala’o ninia atribuisaun no kompetensia ne’ebé la submete ba diresaun ka orientasaun sira husi podér politíka nian. CI nia misaun prinsipál mak atu promove liberdade espresaun no liberdade imprensa iha railaran. (CI)