Komunikadu Imprensa

 CI ASINA NOTA DE INTENDIMENTU HO UNESCO NO GOVERNU HOLANDA

CI ASINA NOTA DE INTENDIMENTU HO UNESCO NO GOVERNU HOLANDA

Iha Konferénsia World Press Freedom Day, iha loron 1 to’o 4 Maiu, 2017 iha Jakarta Convention Center (JCC), Jakarta Indonézia, Conselho de Imprensa de Timor-Leste (CI) asina Nota de Entendimentu (Letter of Intent) entre UNESCO, Conselho de Imprensa de Timor-Leste no Ministériu Negósiu Estranjeiru Olanda.

Objetivu Nota de entendimentu ne’e atu hametin kooperasaun entre CI, UNESCO no Governu Olanda liuhosi Ministériu Negósiu Estranjeiru Olanda, hodi hametin instituisaun no serbisu Conselho de Imprensa nian, ne’ebé foku iha área tolu (3) maka hanesan; haforsa entidade reguladora mídia iha Timor-Leste, fó kontribuisaun ba dezenvolvimentu edukasaun, formasaun no akreditasaun ba Jornalísta iha Timor-Leste. No ikus fahe esperiénsia hosi kompeténsia no serbisu Conselho de Imprensa iha nivel rejiaun no internasionál.

Nota de entendimentu ida ne’e asina iha loron 2 fulan Maiu tinan 2017, iha JCC, Jakarta Indonézia. Reprezenta Conselho de Imprensa maka Prezidente Conselho de Imprensa, Sr. Virgílio da Silva Guterres, Reprezenta UNESCO, Sr. Shahbaz Khan, Diretór no Reprezentativu UNESCO iha Jakarta no Reprezenta Governu Olanda maka Sua Exelensia, Sr. Kees Van Baar, Embaixadór de Direitus Umanus nian.

Iha okaziaun ida ne’e, Conselho de Imprensa, UNESCO no Embaixadór Direitus Umanus Olanda nian ko’alia kona-ba área importante sira hanesan Protesaun ba Jornalísta sira no sistema monitorizasaun kona-ba insidente violénsia kontra Jornalísta, ne’ebé UNESCO maka hala’o hela rejistu, no ikus mós diskuti kona-ba mekanízmu monitorizasaun ba Online Mídia no hate speech.

Prezidente Conselho de Imprensa, Virgílio da Silva Guterres, agradese ba UNESCO no ba Governu Olandes ne’ebé tau importánsia ba dezenvolvimentu mídia iha Timor-Leste. No espera katak ho kooperasaun ida ne’e bele reforsa liu tan dezenvolvimentu Conselho de Imprensa iha Timor-Leste hanesan entidade reguladora ne’ebé ho Kompeténsia atu promove liberdade imprensa iha Timor-Leste.

Partisipa iha eventu asina nota de entendimentu ida ne’e maka hanesan, Aung H. Tun, Vice Cairman (1), reprezentante hosi Myanmar Press Council, Kishore Shrestha Vice Chairman of World Association of Press Council (WAPC), no Acting Chairman of Press Council Nepal, Nezar Patria, Indonézia Press Council, Sr. Shahbaz Khan, Diretór no Reprezentativu UNESCO Jakarta office, Sua Exelensia Sr. Kees Van Baar, Embaixadór Direitus Umanus, ho nia komitiva hosi Ministériu Negósiu Estranjeiru Olanda no delegasaun hosi Conselho de Imprensa maka Virgílio da Silva Guterres, Hugo Maria Fernandes no Paulo Adriano da Cruz Araújo. (CI)