Rezultadu analiza midia deskobre katak, “Mídia sira fó espasu boot liu ba lider ne’ebé la’os kandidatu duke kandidatu rasik.”
CI nota katak, kobertura orgaun komunikasaun sosiál balun nian ladun parsiál no ladun fó ekelíbriu ba kandidatu hothotu. Nune’e, implikasaun públiku ka ema barak ladun hatene kona-ba kandidatu seluk sira nia hanoin.
“Loloos ne’e mídia sira tenki fó espasu boot liu ba kandiadatu sira, tanba públiku hakarak hatene kandidatu prezidente sira nia hanoin. Eleisaun prezidente ne’e, sidadaun hili ema, tanba ne’e kandidatu sira nia hanoin maka importante” Isplika Prezidenti Conselho Imprensa Virgílio da Silva Guterres liuhosi konferensia imprensa, Segunda, 27/03/2017, iha salaun Plenária CI.
“Notísia sira ne’e maka ami halo análize. Hosi análize ne’e iha komunikadu ami hakarak hato’o pontus balun katak Conselho Imprensa ejiste atu tau matan mós ba independénsia no objetividade liberdade imprensa ninian no direitu públiku ninian atu hetan informasaun loloos nomós hosi mídia sira,” Virgílio dehan.
Conselho de Imprensa mós lamenta ba RTTL.ep ne’ebé maka nu’udár orgaun komunikasaun Estadu nian la rezerva direitu de antena ba kandidatu sira nian durante periodu kampaña.
“CI akompaña katak, la iha kandidatu Prezidente Repúblika ida mós maka hato’o kampaña liu hosi RTTL.ep. Legalmente kompete ba CNE ho STAE atu halo avaliasaun bazeia ba dekretu do Governu no.5/2017 regulamentu kampaña no propaganda Eleitorál artigu 19 kapitulu IV kona-ba direitu antena”.
Prezidente Conselho Imprensa, Virgílio da Silva Guterres hatete, CI halo análize notísia ho baze fundamentál rua (2), primeiru, independensia no objetividade liberdade imprensa ninian, segundu, direitu públiku ninian atu hetan informasaun loloos nomós hosi mídia sira. Baseia ba lei komunikasaun sosial numeru 5 / 2014 fulan novembro.
Nu’udár hatur nanis ona iha Lei Komunikasaun Sosiál numeru 5 / 2014 no Estatutu Conselho Imprensa baseia ba dekretu lei nomeru 25 / 2015 (CI) nian katak, CI nia kompeténsia importante maka, promove liberdade espresaun no imprensa, promove independénsia ba meius komunikasaun sosiál nian hosi kualkér influénsia indivídu, grupu ka interese polítiku no ekonómiku sira.
Asegura katak asesu ba profisaun jornalísta nian sei halo tuir kondisaun legál sira ne’ebé bele aplika, promove no asegura atu atividade jornalísta sira nian bele dezenvolve ho profisionalizmu hodi respeita padraun Kódigu Étiku no promove diálogu entre orgaun komunikasaun sosiál, sosiedade no orgaun estadu sira seluk.
Iha ámbitu liberdade espresaun no liberdade imprensa ne’ebé proteje ona iha Konstituisaun Artigu 40 no 41, orgaun komunikasaun sosiál hala’o nia kna’ar durante kampaña prezidensiál to’o eleisaun prezidensiál la’o di’ak.
Iha biban ne’e, Conselho Imprensa apresia mídia balun, liu-liu estasaun Televizaun Edukasaun ka TV-E tanba hamosu programa “D’Challenges” ne’ebé tulun votantes no públiku hodi kompriénde substánsia matéria kampaña hosi kandidatu presidenti sira.
“Tuir CI nia hanoin progama TV-E nian ne’e fó duni posibilidade ba votante sira no públiku em jerál atu kompriende didi’ak saída maka vizaun, misaun no polítika ka programa prioridade hosi kandidatu ida”.
Tuir komunikadu haktuir rekomendasaun haat (4) importante maka hanesan; primeiru, Husu ba Orgaun komunikasaun sosiál atu fokus halo kobertura ba substánsia kampaña partidu polítiku ida-idak nian; segundu, halo kobertura ba serbisu no lala’ok orgaun Eleitorál sira, hanesan CNE, STAE ho MAE.
Terseisu, Ba RTTL.ep atu kumpri obrigasaun haktuir lei Eleitorál kona-ba direitu antena ba kandidatu sira no ba oin ba partidu polítiku ne’ebé sai konkorente iha eleisaun parlamentar hodi garante informasaun ba sidadaun sira hodi foti desizaun ne’ebé konsiénte atu hili sira nia saseluk ba parlamentu; terseiru, Halo tratamentu kobertura ne’ebé justu no ekilibradu ba kandidatu ka partidu polítiku sira ne’ebé konkore iha eleisaun. (*)