CONSELHO DE IMPRENSA APROVA KODÍGU ÉTIKA JORNALITÍKA

Kodigú Étika Jornalístika Timor-Leste ne’e sei lori ba Jornal da Republika iha Segunda, 16 fulan Janeiru 2017 atu publika no sei sai nudar matadalan ba jornalista sira atu hala’o knar ho profesional.

Lee tiha regulamentu numeru 1/2017, de 13 de Janeiro, no hafoin tama ba pontu sira Kodigu Etika Jornalístika ne’e, ikus mai plenaria aprova ho vigor matadalan nasional ne’e. 

“Kodigú Étika Jornalístika ida ne’e mak regulamentu numeru dahuluk Conselho de Imprensa nian. Conselho de Imprensa hala’o ona nia mandatu no Kodigú Étika Jornalístika ne’e importante tanba sei sai hanesan matadalan ba atividades jornalistika iha TL,” hateten Prezidente Conselho de Imprensa, Virgilio da Silva Guterres, hafoin aprova matadalan nasional ne’e. 

Kodigu Etika Jornalístika ne’e tetu mos ba referensia lubun hosi nasaun sira seluk inklui hanesan Australia, Indonesia no Portugal nomos tau konsiderasaun ba Kodigu Etika Jornalista 2013, auto-regulasaun ida ne’ebe aprova hosi asosiasaun media tolu, maka hanesan Asosiasaun Jornalista Timor Lorosa’e (AJTL), Sindicato Jornalista Timor Leste (SJTL) ho Timor Leste Press Club (TLPC). Hafoin ida ne’e, esbosu Kodigu Etika Jornalístika lori ba konsulta ho parte interesadu sira iha nivel nasional no mos munisipiu no elabora hanoin hirak ne’ebe tama mai hosi konsulta publika hodi hasai pontu sanulu, inklui pontu foun ida kona-ba evita publika lian ka imajen ne’ebe hakanek ema nia sentimentu.

Kodigu Etika Jornalístika Timor-Leste aprova tuir artigu 1.° (Regulasaun tuirmai) Dekretu Lei n.° 25/2015 Ne’ebe Kria no Aprova Konsellu Imprensa no Ninia Estatutu no agora atu publika iha Jornal da Repúblika.

Iha ninia intervensaun hafoin aprova Kodigú Étika Jornalístika ne’e Prezidente Consleho de Imprensa bolu atensaun ba orgaun komunikasaun sosial atu halo tuir Kodigú Étika Jornalístika ne’e.

“Husu ba jornaslia sira, orgaun Komunikasaun Sosial atu garanti ninia ema sira komprende siginifka hosi pontu sira ida-ida. Hamutuk ho ida ne’e Conselho de Imprensa sei publika mos ninia interpretasaun atu fasilita jornalista sira bele intende didiak pontu idaidak.” dehan Prezidente Conselho de Imprensa Virgilio da Silva Guterres. 

Conselho Imprensa sei halo actividades kona ba sosializasaun Kodigú Étika Jornalístika ne’ebe foin aprova atu grante liberdade imprensa no liberdade espresaun iha Timor-Leste. Susesu ida ne’e sura ho ita boot sira nia apoiu no kolaborasaun iha futuru.

Kodigu Etika Jornalístika Timor-Leste mak regulamentu dahuluk ne’ebe Conselho de Imprensa aprova ona. Conselho de Imprensa mos aprova ona hodi distribui no halo konsulta ba públiku regulamentu daruak nian sobre Rejistu Orgaun Komunikasaun Sosial no Dezenvolvimentu Instituisaun Jornalista. Esbosu regulamentu ne’e sei sai ba públiku iha tempu besik.

Atu hetan informasaun klaru bele kontaktu Nú.: + 670 73173198/ 77961515, 73173193/ 77948155, ou E-mail: Este endereço de email está sendo protegido de spambots. Você precisa do JavaScript ativado para vê-lo.


Imprimir   Email