Dili- Conselho de Imprensa, iha Kinta feira (11/1/2017), simu tan keixa ida husi Asosiasaun Jornalista Timor Lorosa’e (AJTL) ho Timor-Leste Press Union (TLPU) kona-ba kazu diskiriminasaun ne’ebe pratika husi ofisial ida iha aeroporto Dili hasoru jornalista Diariu Timor Post, Cristovão de Jesus da Silva, iha loron 9/1/17, wainhira jornalista ne’e, halo kobertura ba kantora Maria Vitoria ne’ebe atu fila ba Indonesia.
Ida ne’e kazu dahuluk ne’ebe Conselho de Imprensa simu iha inisiu tinan foun 2017, no kompleta numeru kazu anterior hamutuk keixa haat mak Conselho de Imprensa simu ona desde ninia establesimentu iha Maiu 2016. Kazu hirak ne’e, ida mak publikasaun Jornalista Oki nian ne’ebe involve asesor financas, atual PM Rui Maria Araujo. Pozisaun Conselho de Imprensa nian ba kazu ida ne’e mak prontu atu sai sasin profisional bainhira tribunal husu. Kazu tolu seluk mak jornalista jornal Business Timor no jornalista Tafara hetan violensia fizika hosi individu polisia no forsa sira, e mos kazu ikus diskriminasaun hasoru jornalista Timor Post iha aeroporto Dili. Ba kazu rua ne’ebe involve individu polisia no forsa, Conselho de Imprensa haruka ona karta ba instituisaun PNTL hodi kondena hahalok violentu ne’e no to agora laiha resposta hosi instituisaun refere.
Hatan ba kazu ne’e, Prezidente Conselho de Imprensa, Virgilio da Silva Guterres husu ba instituisaun hot-hotu atu fo tratamentu hanesan ba jornalista sira no labele diskrimina media ida ho ida seluk.
“Jornalista hosi media sira hotu hanesan. Labele halo diskriminasaun ba media Governo ka swasta. Instituisaun hot-hotu tenki garanti asesu hanesan ba jornalista sira,” afirma Virgilio da Silva Guterres.
Hare ba kazu ida ne’ebe foin akontese Conselho de Imprensa hanoin katak presija hamosu matadalan (gia) ida no hato’o ba instituisaun hothotu atu fasilita media no jornalista sira hala’o sira nia knar ho diak no profisional
Conselho de Imprensa oras ne’e dadauk dezenvolve hela padraun sira oinsa atu atende no simu keixa, atu nune’e bele fasilita diak liutan prosesu hato’o no atende keixa ba no mai hosi publiku, inklui mos hosi jornalista sira rasik. Iha parte hasa’e kredibilidadi ba jornalista sira, Conselho de Imprensa mos oras ne’e dadauk ho proridade a’as prepara regulamentu ida kona-ba karteira professional hodi sertifika jornalista sira hosi publika no ema ne’ebe laos jornalista maibe hala’o serbisu balu ne’ebe haree hanesan jornalistíka.
“Maske seidauk finaliza maibe espera katak iha tempu besik padraun hirak ne’e bele halo ona no bele konsulta ba publiku atu nune’e bainhira aprova ona sei asegura profisaun jornalista nian iha Timor-Leste,” hateten Virgilio Guterres.
Atu hetan informasaun klaru bele kontaktu Nú.: + 670 73173198/ 77961515, 73173193/ 77948155, ou E-mail: Este endereço de email está sendo protegido de spambots. Você precisa do JavaScript ativado para vê-lo.