Dili, 5 de Agostu de 2016 - Nu’udar nasaun demokrátiku, Timor-Leste garante tiha ona liberdade imprensa iha espresaun no liberdade imprensa.Iha lei Komunikasaun Sosiál konsidera katak direitu ba informasaun, liberdade espresaun no imprensa sai fundamental, laos deit atu kumpri buat hirak lei inan haruka, ne’ebé hakerek ona iha artigu 40 no 41 maibe mos atu asegura harii Estadu ida tuir direitu demokrátiku. Ho hanoin katak saida deit mak imprensa sira luta ba, hanesan ho prinsipiu nasaun nian, ne’e mak demokrásia, estadu do direitu no bem-estar ka moris diak sosiál nian.
Hare ba kazu agresaun fiziku hasoru jornalista Bisnis Timor iha Segunda loron 25 fulan Julutinan 2016, Konsellu Imprensa konsidera ida ne’e impede ona jornalista no meius komunikasaun sosial sira hodi hala’o sira ninia nia funsaun. Jornalista iha direitu atu hetan asesu, bainhira nia hala’o hela ninia funsaun ba eventu hotu-hotu ne’ebé nakloke ba publik nudar lei Komunikasaun Sosial hatur ona iha artigu 19 pontu 3; nune’e mos iha pontu 7 ne’ebe haktuir momos katak iha kazu saida deit material profesional ne’ebé jornalista iha, nein obriga nia atu hatudu elementus ne’ebé mak nia halibur ona, karik oinseluk iha desizaun judisial nian.
“Agresaun fiziku hasoru jornalista no hadau ka estraga ekipamentu kobertura ne’ebe jornalista sira iha ne’e kontra lei Komunikasaun Sosial. Sa tan aktu ne’e halo husi ajente estadu sira nian. Konsellu Imprensa lamenta tebes ho atuasaun husi membru PNTL ne’e ba jornalista husi Bisnis Timor. Konsellu Imprensa mos hakarak hatoo ba entidade hotu-hotu, liu-liu instituisaun estadu no governo nian atu fo izemplu diak ba garante Liberdadede imprensa no expresaun iha Timor-Leste nudar Konstituisaun no Lei hatur ona.” dehan Presidente Interinu Jose Maria Ximenes.
Kazu agresaun fiziku hasoru jornalista agora dadaun iha hela Ministeriu Publiku. Konsellu Imprensa tau matan hela ba ninia progresu. Komisariu Paulo Araujo akresenta katak “Konsellu Imprensa akompaña hela progresu husi kazu ne’e no oras ne’e dadaun kazu ne’e iha hela prosesu jurídiku ninia kompetensia ho nune’e Konsellu Imprensa fo fiar tomak ba autoridadi kompetente atu bele hala’o ninia knar.”
Iha biban ida ne’e Konsellu Imprensa husu ba autoridadi sira hotu liliu Instituisaun Polisia Nasional (PNTL) atu respeita no fo fatin ba jornalista atu hala’o ninia knar no profisaun ho dignu. Iha futuru bainhira iha kestaun ruma la kumpri etika profisaun nian, Konsellu Imprensa prontu atu fasilita no halo mediasaun.