Conselho de Imprensa de Timor-Leste (CI) Dirasaun Apoiu Juridiku no Supervisaun (DAJUS) CI, sosializa  Lei komunikasaun Sosiál (LEI N.^U 5 /2014, loron 19, fulan-novembru) nomós Direitu Resposta no Retifikasaun, ba Estudantes Fakuldade Siensia Sosiál, Departamentu Komunikasaun Sosiál, Universidade Oriental Timor Lorosa’e (UNITAL).

Tuir atribuisaun artigu 44 Lei Komunikasaun  Sosiál, Conselho de Imprensa (CI) iha kompetensia ida mak promove Diálogu entre operadór sira Komunikasaun Sosiál no Orgaun sira Estadu nian, atu idak idak bele halo knar ho diak no respeita nafatin direitu sira ne’ebe hetan protesaun husi Lei.

Atividade ne’e ho objetivu atu Universitariu sira kompriende konaba kontiudu husi Lei Komunikasaun Sosiál nomos iha koñesimentu klean atu oinsa asesu ba profisaun jornalista.

“Sosializasaun lei komunikasaun sosiál ba ita nia komunidade, publiku no liuliu ba estudante sira atu bele hatene konaba servisu mídia no jornalizmu,” esplika Konselleiru Amitu Araujo, durante abertura sosiliazasaun, iha salaun UNITAL, Becora, Dili, Tersa-feira (25/04/2023).

Amitu Araujo esklarese, sosializasaun ne’e impotante tanba nudar materia akademika, “Hau nia rekomendasaun ba kolega estudante sira materia sira ne’ebé hetan ne’e importante tebes, tanba ida ne’e materia akademika  presiza tebes kompriende no hatene ninia pratika no implementasaun, esplika Amitu Araujo.

Hafoin abertura kuntinua ho lia menon husi Dekanu Fakuldade Siensia Sosiál UNITL no apresentasaun Materia konaba Lei Komunikasaun Sosiál inklui Direitu Resposta no Retifikasaun, ne’ebé hato’o hosi Diretór Diresaun Apoiu Juridiku no Supervisaun (DAJUS) CI, Zenilton Zeneves.

Iha sesaun diskusaun, Estudante UNITAL mos hato’o sira ninia perguntas liga ho knar Journalizmu no Mídia. Enkuantu hafoin diskusaun ne’e remata, equipa husi CI mos ba hare fasilidades produsaun inklui studio Radio no Televizaun UNITAL.

Lei Komunikasaun Sosiál (Númeru 5/2014) koalia kona-ba asuntu 4 mak hanesan, Jornalista , Orgaun Komunikasaun sosiál, Meiu Komunikasaun sosiál (Radiu, TV, Imprimi no On Line) inklui Conselho de Imprensa ne’ebé nu’udar Instituisaun Autónomu.

Entertanto, Direitu ba resposta katak, direitu ba kada pesoa ou grupu, hodi  publika resposta ba konteúdu notisia ida ne’ebé fó-sai faktu ofende ema nia onra, naran di’ak, reputasaun ka imajen. Direitu retifikasaun katak, kada sidadaun ou grupu iha direitu hato’o ba mídia hodi hadia notisias ne’ebé sala no ofende fali ita ninia onra, naran diak, reputasaun ka imajen.

Tuir lei komunikasaun sosiál  Númeru 5/2014,  alinea g hateten, kada sidadaun ou grupu iha direitu ba hatan no retifikasaun atu mídia ne’ebé publika notisia sala tenki hadia  ho tempu loron 30, konta hosi data publikasaun. Parte ne’ebé kontra lei ne’e sei multa osan dolares rihun rua atus lima to’o rihun sanulu.

 

Conselho de Imprensa estabelese baseia ba Lei Komunikasaun Sosiál, Nú:5/2014 liu hosi Dekretu-Lei Nú:25/2015. Instituisaun ne’e formalmente hahu nia knaar iha loron 10 fulan Maiu tinan 2016, loron ne’ebé Prezidente Parlamentu Nasional fo tomada de posse ba Membru CI nain 5 ne’ebé ninia kompoziaun mak membru nain 2 nomeadu hosi Parlamentu Nasionál, 2 hosi Jornalista no 1 seluk hosi Orgaun Komunikasaun Sosiál. (CI)