Semana Liberdade Imprensa

Mídia Importante ba Públiku

Mídia Importante ba Públiku

“Kuandu hare ba papél mídia nian iha períodu ne’e, iha mundu mídia, domina hosi mainstreaming mídia, jornál, estasaun radio, estasaun TV no seluk tan, hau la’ós jornalista, maibé iha dalan ida hosi hau nia hateke ba ida ne’e katak, mídia halo istória foun hodi fó hatene ba públiku hodi hanoin saida mak akontese.” dehan The UN Residence Coordinator.

Roy Trivedy hato’o hanoin ne’e iha ninia diskursu durante konferénsia internasionál Dili Dialogue Forum 2019, iha loron da ruak, ne’ebé hala’o iha Salaun São José, Katedrál (10/5/2019) ho tema, Mídia Sosiál : Obstakulu ba Jornalizmu no Privasidade Iha Sosiedade Modernu.

Kordenador Residensia UN iha Timor-Leste ne’e informa mós kona-ba servisu UN Iha Timor-Leste, desde Referendum to’o agora.

Iha oportunidade ne’e, Embaixadór Reinu Olanda, Rob Swartbol, iha nia intervensaun, hato’o parabéns ba Conselho de Imprensa de Timor-Leste (CI) no UNESCO tanba bele organiza eventu fantástiku ne’e.

Rob Swartbol mós ko’alia kona-ba teknolojia avansadu, informasaun falsu ka fake news ne’ebé publika iha mídia sosiál ho ninia influensia ba públiku.

Iha fatin hanesan, Reprezentante Conselho de Imprensa Sudeste Aziátiku no Pasífiku “Fahe Esperiénsia” kona-ba “Mídia Sosiál : Obstakule ba Jornalizmu no Privasidade Iha Sosiedade Modernu”.

Iha loron daruak II Forum Diálogu Dili ne’e mós, Conselho de Imprensa de Timor-Leste lansa Relatóriu Annual Conselho de Imprensa de Timor-Leste tinan 2018, asina Nota Entendimentu entre CI no AJTL.

II Forum Diálogu Dili ensera hosi Prezidente da Repúblika, Francisco Guterres “Lú-Olo”. Iha oportunidade ne’e Xefi Estad entrega mós prémiu Conselho de Imprensa ba manán na’in sira hanesan, Jornalista Candido Alves, Jornalista Aniceto dos Reis no fotógrafu Dilma Suzete.

Konferénsia Internasionál hala’o tamba CI hean apoiu orsamentu no apoiu tekniku hosi UNESCO, UNDP, Embaxada Novazelandia, Portugal, Ong AGEH hosi Alemania, Timor Telecom , Hotel Timor inklui apoiu hosi Ministeriu Negosios Estrangeirus no Koperasaun, Diresaun Nasionál Patremonia Estadu hosi Ministeriu Finansas, Sekretaria Estadu Komunikasaun Sosiál no seluk tan. (CI).