Semana Liberdade Imprensa

Públiku Preukupa Tamba Media La Verifika Informasaun

Públiku Preukupa Tamba Media La Verifika Informasaun

“Bazeia ba peskiza badak ne’ebé CI halo, ema barak preokupa ho mídia ne’ebé uza informasaun mai hosi mídia sosiál maibé sira nunka halo konfirmasaun, nunka halo verifikasaun ba informasaun sira ne’ebé iha mídia sosiál, ida ne’e mak sai kestaun,” haktuir Diretór DDAM.

Alberico da Costa Junior hato’o hanoin ne’e, iha sesaun paralelu ne’ebé foka ba asuntu optimalizasaun uza mídia sosiál iha jornalizmu, durante konferénsia Internasionál Dili Dialogue Forum (DDF) 2019, iha Salaun São José, Katedrál, 9/5/2019, ho tema, Mídia Sosiál : Obstakulu ba Jornalizmu no Privasidade Iha Sosiedade Modernu.

Diretór DDAM ne’e husu ba mídia tenki konfirma no verifika informasaun ne’ebé rekolla hosi mídia sosiál molok fo sai ba públiku.

Iha oportunidade ne’e, Bob Howard, nu’udar Country correspondent ba Timor-Leste, Papua New Guinea no Solomon islands ba Reporters Sans Frontiers (Paris) esplika katak, mídia sosiál sai tiha hanesan trend ida ne’ebé públiku bele partisipa hodi hato’o informasaun.

“Vantajen mídia sosiál mak komunikasaun no kuaze ita hotu uza, hanesan ohin Sekretáriu Estadu Komunikasaun Sosiál informa  katak dadauk ne’e iha ona trend ida ne’ebé ema bolu citizen journalism   ka jornalizmu hosi sidadaun hotu ne’ebé partisipa uza mídia sosiál hodi transfere informasaun ka notísia sira,” informa Bob. 

Orador seluk iha topiku ne’e mak, Novi Kurnia, nu’udar Lecturer no Head of Postgraduate Programme of Communication Science, Universidade Gadjah Mada, ne’ebé nia apresentasaun foka ba asuntu disinformasaun no pratika jornalizmu.

Iha oras hanesan iha mós diskusaun paralelu ne’ebé koalia kona-ba diskriminasaun hasoru mídia, jornalista no advokasia mídia, ne’ebé ho orador sira hanesan Kathryn Roja G. Raymundo, hosi SEAPA, Prezidente AJTL David Hugo da Silva, no Domingos Saldanha, hosi STL Mídia Group. 

Iha ninia apresentasaun, Domingos Saldanha, fahe esperiénsia kona-ba dezafiu ne’ebé STL enfrenta iha tempu okupasaun Indonesia no iha tempu ukun an. Tuir nia dezafiu boot liu iha STL mak ekonomia finanseiru  maibé mídia ne’e kuntinua existe.

Sorin seluk, Prezidente AJTL, David Hugo, informa sobre relatóriu ne’ebé AJTL kada tinan haruka ba SEAPA hodi publika mundialmente ba públiku kona-ba lala’ok mídia iha Timor-Leste. Alein ne’e informa mós advokasia nasionál no internasionalmente sira ne’ebé AJTL halo relasiona ho dezafiu sira ne’ebé mídia hasoru no oportunidade kapasitasaun sira ne’ebé AJTL oferese. 

Kathryn Roja G. Raymundo, hosi SEAPA, esplika kona-ba servisu sira hosi SEAPA hanesan halo analiza, advokasia, oferese treinamentu inklui oinsa ajuda rezolve preokupasaun finansiál ne’ebé mídia sira hasoru. (CI)