Semana Liberdade Imprensa

Demokrasia La Kompletu Sein Asesu Ba Informasaun

Demokrasia La Kompletu Sein Asesu Ba Informasaun

“Ita hatene saida mak sosiál mídia, no hanoin ita la hatene asuntu balun no buka hatene maka oinsá atu uza, benefísiu ba ita nia an no mós sosiedade sira, tanba ne’e mak ita konvida kolega sira ne’ebé espertu iha área ne’e atu fahe sira nia esperiénsia no mós sira nia koñesimentu ba ita.”

Prezidente CI hato’o lia ne’e iha sesaun abertura ba segundu konferénsia internasional Dili Dialogue Forum 2019, ne’ebé hala’o iha Salaun São José, Katedrál, 9/5/2019, ho tema, Mídia Sosiál : Obstakulu ba Jornalizmu no Privasidade Iha Sosiedade Modernu.

Virgílio da Silva Guterres esplika katak, partisipantes sira bele uza esperiénsia hodi orador internasionál sira kona-ba oinsa produz polítika institusionál ou personál atu uza  plataforma ne’e (media sosiál).”

Iha oportunidade ne’e, Diretór no Representante UNESCO iha Jakarta (Indonesia), Shahbaz Khan, iha sesaun abertura ne’e hato’o mesajen hosi Sekretáriu Jerál Nasoins Unidas, Antonio Guterres, relasiona ho pás, justisa no direitu umanu.

“Laiha demokrasia ne’ebé kompletu  sein asesu ba transparénsia no informasaun ne’ebé relevante,” esplika Shahbaz Khan.

Representante UNESCO ne’e  mós agradese ba kolaborasaun di’ak hosi Conselho de Imprensa de Timor-Leste, no konsidera diálogu ne’e importante ba partisipantes, importante ba sistema UN, ba komunidade Timor-Leste, ba liberdade imprensa  no ba liberdade espresaun iha mundu.

Oradór ba II Dili Dialogue Forum mai hosi Nasionál no Internasionál liuliu Conselho de Imprensa sira iha sudueste aziátiku no Pasífiku hanesan hosi Indonesia, Australia, Filipina, Thailandia, Myamar no seluk tan inklui Jornalista Senior hosi Portugal, Adelino Gomez.

Alem de ne’e, partisipa ema kuaze 300, konta hosi Jornalista, Responsavel Orgaun no Meius Komunikasaun Sosiál, Asosiasaun Jornalista, Estudante Departementu Komunikasaun Sosiál hosi UNTL no UNITAL, Prezidente Parlamentu Nasionál, Membru Governu,  Embaixadór sira inklui Agensia Lokál no Internasionál. (CI)