Díli – Conselho de Imprensa de Timor-Leste (CI), sosializa regulamentu Direitu Responta no Retifikasaun nomós sosializa métodu monitorizasaun no análiza ba produtu jornalístiku ba ofisiál relasaun públika husi liñas ministeriais no entidade estadu.
Atividade ne’e realiza iha salaun enkontru Conselho de Imprensa, Quintal Boot, Dili, Kinta-Feira (28/10/2021), ho objetivu atu oinsá bele enkoraja entidade estadu sira nian atu bele ejerse direitu resposta no retifikasaun ba publikasaun sira iha órgaun no meiu komunikasaun sosiál sira.
Direitu resposta hanesan direitu ne’ebe permite ba ema hodi hatan ba publikasaun husi orgaun no meiu komunikasaun sosial sira ne’ebe nia material afeta ba ema nia reputasaun, naran di’ak no desfama ema nia pesoal. Direitu retifikasaun maka oinsa bele halo koresaun ba notisia sira ne’ebé fó sai ona iha orgaun no meiu komuniksaun sosiál sira ne’ebé afeta ba ema ka instituisaun ida nia naran di’ak.
Prezidente Conselho de Imprensa, Virgílio da Silva Guterres hatete atividade sosializasaun regulamentu direitu resposta no retifikasaun atu bele enkoraja pesoál relasaun publika sira iha kada instituisaun estadu hodi bele ejerse nia dereitu ba hatan no retifikasaun ba nutisia ne’ebé laloos kona-ba instituisaun relevante.
“Conselho de Imprensa organiza enkontru ne’e atu fó hatene ba media officer sira atu hare saída maka publiku nia hare, nia hanoin no ko’alia kona-ba o nia instituisaun, o nia superior. Sé buat balun di’ak, halo apresiasaun, sé ko’alia buat ne’ebé ladun loos kona-ba instituisaun, halo koresaun,” esplika Prezidente CI.
Prezidente CI mós enkoraja ofisiál relasaun públika sira atu mantein ho monitorizasaun ba produtu jornalistiku sira ne’ebé iha relevansia ho instituisaun ne’ebé haknaar-án ba nune’e bele fo pareser ida di’ak ba líder superior hodi bele ejerse direitu resposta no retifikasaun ne’ebé haktuir ona iha lei komunikasaun sosiál.
Konteudu notisia sira ne’ebe presiza atu monitoriza mak hanesan tópiku notisia, lead notisia, body of the news, kontextu no background. Monitoriza mós notisia iha aspetu étika hanesan ezatidaun no balansu notisia.
Iha okaziaun ne’e, Komisariu KAK, Dr. Sergio Hornay hatete midia nia ejistensia importante ba iha liberdade imprensa iha sosiedade demokratiku iha hanesan estadu de direitu demokratiku RDTL.
CAC nia misaun ida maka atu halo parseria ida metin liutan ho midia sira liuhusi Conselho de Imprensa nune’e bele fo kontribuisaun ida diak ba boa Governasaun iha Timor-Leste.
Entretantu Kordenador Xefe Relasaun Públika Gabinete Primeiru Ministru, Paizinho Tilman hatete oportunidade di’ak ba ofisial relasaun publika sira bele hetan informasaun foun ne’ebe tulun tebes pesoal relasaun publika atu bele kordena di’ak liutan ho midia sira.
Paizinho mós husu atu sosializasaun ne’e hala’o mos ba ofisial sira ne’ebe serbisu iha Gabinete orgaun soberanu sira nian nune’e bele transmite di’ak liutan informasaun ida di’ak liu ba superior sira ba ejerse direitu resposta no retifikasaun.
Partisipa iha atividade sosializasaun ne’e, Prezidente Conselho de Imprensa, Komisáriu Komisaun Anti Korupsaun, Komisariu Komisaun Nasional das Eleisoens, pesoal relasaun publika sira husi kada liñas ministeriais hotu. (CI)