Atividade

Conselho de Imprensa hato’o Votos de Pesar ba Matebian Max Stahl

Díli – Conselho de Imprensa de Timor-Leste (CI) hato’o votos de pesar ba matebian Max Stahl ne’ebé hakotu ona nia peregriñasaun (mate) iha tuku 4:30 madrugada oras Brisbane, Australia.

Kinta feira, 28/10/2021, Plenária ornáriu Conselho de Imprensa de Timor-Leste kompstu husi Virgílio da Silva Guterres (Prezidente), Benevides Correia Barros (Membru), Expedito Dias Ximenes (Membru), Otelio Ote (Membru) no Francisco Belo Simões da Costa (Membru), aprova votos de pesar ba antigu jornalista Max Stahl.

Max Stahl nu’udar jornalista ida ne’ebé maka halo filmajen ba asasinatu masakre 12 de Novembru 1991 iha semitériu Santa Cruz Díli, ne’ebé fanun no muda opiniaun mundu nian hodi hare ba povu Timor-Leste nia luta ba ukun rasik-án.

“Conselho de Imprensa hakarak hato’o ami nia votos de pesar ba Max Stahl. Ba ita Timor, nia (Max Stahl) la’ós jornalista de’it, nia ema boot, bele dehan as wa’in ida ne’ebé ita sei konta hamutuk ho ita nia as wain ne’ebé mate dezede 1974 tesik mai, liuliu sira ne’ebé Max Stahl sai testemuña iha Santa Cruz,” Prezidente Conselho de Imprensa hamutuk ho membru na’in haat, hato’o votos de pesar ne’e liuhusi konferensia imprensa ida iha salaun plenária CI, Quintal Boot, Dili, kinta-feira (28/10/2021).

Prezidente dehan Conselho de Imprensa, família boot órgaun no meiu komunikasaun sosiál hotu, lakon ita nia eroi boot ida, Max Stahl hanesan rai lakan ida ne’ebé mosu iha udan boot iha Timor-Leste nia luta ba ukun rasik-án, ohin loron ita rona rai lakan ida tarutu hatudu ita lakon luta na’in ida.

Jornalista Christopher Wenner koñesidu ho Max Stahl ne’ebé sama ain dahuluk mai Timor-Leste iha loron 30 Agostu 1991 hanesan turista no ikus mai nia konsege halo filmajen ba masakre Santa Cruz.

Max Stahl iha tinan 66, moris iha Englatera iha loron 6 Dezembru 1954 no hakotu is (Mate) iha loron 28 Outubru 2021, tuku 4 Madrugada oras Brisbane, Australia. (CI)