Balibó – Iha loron daruak, Conselho de Imprensa de Timor-Leste (CI) no Sentru Nasionál Chega (CNC), lansa feira produtu lokál iha komemorasaun Trajédia Balibó Five ba tinan 46, iha Postu Administrativu Balibó, Munisípiu Bobonaro, Kuarta-feira, 13/10/2021.
Prezidente CI, Virgilio da Silva Guterres hateten katak, komunidade Balibó Tenke Sai Nain ba Komemorasaun Balibó Five, iha abertura feria produtu lokál, “ohin ita hahú ho lansamentu feria produtu lokál ba komunidade, ida ne’e elementu balun husi atividade ne’ebé hakarak lori Conselho de Imprensa ho Sentru Nasionál Chega atu neineik ka beibeik transmite komemorasaun ida ne’e ba komunidade Balibó, atu tinan-tinan komunidade sira mak sai nain, sai organizadór ba loron importante ida ne’e.”
Produtu sira ne’ebé grupu kretividade sira no komunidade sira Produz no lori ba iha feira produtu lokál mak hanesan tais mane no tais feto, kohe, kaebauk, morteen no seluk tan inklui ai-han tradisionál oioin.
Hafoin lansa feria produtu lokál kontinua ho Chega tour hodi la’o ain hamutuk husi Hali hun Kampu Balibó ba to’o Kastelu Balibó iha foho Tulak-Kalihau hodi lansa exebisaun dokumental memória pasadu.