Atividade

CI Fasilita Formasaun Jornalizmu Báziku ba Funsionáriu Sentru Chega

Dili – Diretór Diresaun Analiza no Dezenvolvimentu Mídia (DADM), Alberico da Costa Junior, fasilita formasaun jornalizmu báziku ba funsionáriu Sentru Chega, iha salaun Enkontru Sentru Nasionál Chega (CNC), Antigu Komarka, Balidi, Segunda-feira ohin, 20/9/2021.

Formasaun ne’e loke husi Diretór Ezekutivu CNC, Hugo Maria Fernandes, ne’ebé introdús objetivu formasaun katak hala’o hodi melora servisu atendimentu ba públiku através transmite informasaun loos bazeia ba faktus, atuál no kredivel.

“oportunidade ida ne’e, ita partisipa hodi primeiru, enkoraja kolega sira atu hakerek, nia importánsia mak ida ne’e, liuliu kolega sira husi area programatiku ne’ebé mak maioria hetan oportunidade atu  implementa atividade iha terenu, bele uza oportunidade ne’e atu dokumenta, rekorda eventu ne’ebé mak sira rejista ba, e ida ne’e tulun tebes ba oinsá maka ita kapta momentu importánte sira liuliu substánsia ruma husi atividade ne’ebe mak ita partisipa. Segundu tulun kolega sira hakbiit ábitu hakerek relatóriu tanba iha buat esensiál sei fó atu kapta informasaun importante atu kompleta ita nia relatóriu sira. Terseiru importante mós ba ita ne’ebé partisipa atu iha memória pesoál,” informa DE CNC.

Iha sesaun formasaun, Diretór DADM, Alberico da Costa Junior, esplika kle’an no detallu kona-ba saida mak jornalizmu báziku, se mak jornalista, lala’ok servisu jornalistiku, tékniku hakerek no pratika hakerek.

Partisipantes mais menus nain 20 kompostu husi funsionáriu CNC feto no mane ne’ebe ativa tebes iha formasaun ho husu perguntas.  Formasaun ne’e sei hala’o durante loron 3, hahu 20 to’o 22/9/2021.