Atividade

CI Aprezenta Proposta Orsamentu ba Komité Revizaun Orsamentu Polítika

Dili – Prezidente Conselho de Imprensa de Timor-Leste (CI), Virgílio da Silva Guterres no Membru CI no Diretór Ezekutivu, Rigoberto Monteiro no Ezekutivu CI, partisipa iha reuniaun Komité Revizaun Orsamentu – Polítika (KROP) ba OJE 2022, iha Auditóriu Kay Rala Xanana Gusmão, Ministériu Finansas, Ai-tarak Laran, Sesta-feira, 3/9/2021.

Iha biban ne’e, Prezidente CI aprezenta polítika CI ba Komité Revizaun Orsamentu. “Ba 2022, prioridade Conselho de Imprensa nian maka, iha programa rua, ida, garantia liberdade imprensa, liberdade espresaun no asesu ba informasaun, ba programa ida ne’e iha sub-programa haat ne’ebé engloba kompeténsia no obrigasaun Conselho de Imprensa nian hanesan entidade ne’ebé nia servisu atu garante liberdade imprensa no garante direitu públiku atu hetan informasaun, iha laran ne’e inklui mandatu sira Conselho de Imprensa ne’ebé hanesan ho dezenvolvimentu regulamentu sira ne’ebé bele fasilita Conselho de Imprensa hodi superviziona nomós fiskaliza konduta órgaun komunikasaun sosiál no profisionál jornalista sira liuliu hanesan atribuisaun karteira profisionál, nomós parte seluk mak oinsá kontribui ba dezenvolvimentu kapasidade jornalista sira entermus tékniku profisionál e intelektuál.”

Prezidente CI hatutan katak, “aspetu seluk tan mak oinsá halo desiminasaun ba públiku, iha parte ida ne’e mak bainhira aprova planu orsamentu Conselho de Imprensa nian iha plenária, iha diskusaun ne’ebé kle’an hodi to’o iha konkluzaun atu hare katak Conselho de Imprensa nia asisténsia enfrenta krize primeiru mai husi polítika no pandemia e depois kalamidade, entaun situasaun tolu ne’e mak sai báze ba konsiderasaun Conselho de Imprensa nian atu deside alokasaun orsamentu ba 2022.”

Diretór Ezekutivu CI, aprezenta proposta adisionál CI ba Komité Revizaun Orsamentu ho detallu atividade no orsamentu.

Conselho de Imprensa hetan input di’ak tebes ba polítika CI no rekomendasaun adekuadu no interesante ba proposta adisionál CI husi Komité Revizaun Orsamentu.

Aprezentasaun ne’e realiza bazeia ba kalendáriu preparasaun Orsamentu Jerál Estadu (OJE) 2022 ne’ebé sírkula ona liu husi sírkula orsamentu Nú.04/VIII/GMF/2021, previstu atu iha realizasaun Reuniaun Komité Revizaun Orsamentu iha nivel polítika. (CI)