Liquisa - Membru Conselho de Imprensa de Timor-Leste (CI), Konselleiru, Expedito Loro Dias Ximenes, iha “Diálogu Komunitária,” Sesta-feira, 6/8/2021, iha Suku Fahilebo, Postu Administrativu Bazartete, Munisípiu Liquiçá, ne’ebé realiza ho objetivu lori Governu ba komunidade nia leet, hodi komunidade bele hatene programa governu ho kle’an, no Governu rasik rona mós krítika, opiniaun no sujestaun husi komunidade, nu’udar parte ida husi programa Sekretáriu Estadu Komunikasaun Sosiál – SEKOMS iha povu nia leet ne’ebé hanaran “Naroman ba Suku.
Iha “Diálogu Komunitária” ne’e, Konselleiru, Expedito Loro Dias Ximenes, ko’alia kona-ba knar Conselho de Imprensa nian katak, “nia knar prinsipál mak oinsá atu tau matan ba mídia ne’ebé bolu dehan mídia konvensional sira, tanba saida maka tenke tau matan ba mídia konvensional sira, dala barak iha diálogu oioin iha suku dala barak na’i liurai sira, maun alin sira, sempre hare liu prioridade hanesan naroman ba suku ne’e hare liu ba estrada, oinsá bee, oinsá eletrisidade agrikultura, edukasaun mas haluha tiha katak informasaun mós prioridade, importante ba ita nia moris.”
Konselleiru Expedito esplika katak, “tanba ne’e mak iha konstituisaun da repúblika artigu 40, 41, konsagra iha ne’ebá liberdade de imprensa, liberdade de espresaun, ne’e katak sidadaun hotu iha direitu ba informasaun, sidadaun hotu iha direitu atu fó hanoin ne’ebé livre ba iha Estadu, ba iha Governu, laiha ema ida bandu ita fó ita nia hanoin ba Estadu ba Governu kona-ba ita nia sentimentu, ita nia hahalok, ita nia lala’ok iha suku laran.”
Partisipa iha Diálogu Komunitária ne’e Sekretáriu Estadu Komunikasaun Sosiál, Diretór Jerál Sekretáriu Estadu Kooperativu, Membru CI, Reprezentante Prezidente Autoridade Munisípiu Liquiçá, Prezidente BTL, CCLN Liquiçá, Diretór Eletrisidade Liquiçá, Reprezentante Administradór Postu Administrativu Bazartete, Autoridade lokál Suku Fahilebo no komunidade Suku Fahilebo.