Atividade

Prezidente CI Partisipa Diálogu Komunitáriu iha Aldeia Barleu no Soiquili

Lautem - Prezidente Conselho de Imprensa de Timor-Leste (CI), Virgílio da Silva Guterres, hola parte iha “Diálogu Komunitáriu,” nu’udar parte ida husi programa Sekretáriu Estadu Komunikasaun Sosiál – SEKOMS iha povu nia leet ne’ebé hanaran “Naroman ba Suku,”.

Diálogu Komunitáriu ne’e hala’o iha Aldeia Barleu, Suku Laivai Kinta (22/07/2021) no Aldeia Soiquili, Suku Parlamentu Sesta (23/07/2021).

Durante Diálogu Komunitáriu iha komunidade Barleu, Prezidente Conselho de Imprensa de Timor-Leste, Virgílio da Silva Guterres, dehan Conselho de Imprensa nia papel atu hare buat rua ne’ebé sai sidadaun hotu-hotu nia direitu atu hetan informasaun ne’ebé loloos no momoos husi ukun-nain sira.

“Tamba saída mak ita iha direitu atu hetan informasaun, tamba iha tempu kampaña sira la’o door to door, hodi halo promesa ba povu, tamba ne’e kuandu sira mai fali ita iha diretu atu husu fali ba sira, atu sisi tusan ba membru Governu sira ne’e”, dehan Prezidente.

Tamba ne’e tuir prezidente, Conselho de Imprensa nia servisu ida mak garantia liberdade ba sidadaun hotu-hotu atu espresa sira nia opiniaun, atu husu ba ukun-na’in sira saída mak sira halo, no kompromísiu sira ne’ebé hato’o durante sira mai halo kampaña Eleisaun.

Prezidente afirma, Programa Naroman ba Suku la’ós naroman iha Ahi ou Eletrisidade nia lakan de’it maibé Naroman mós iha Timor-Leste nia istória, liu-liu ba liafuan sira ne’ebé uza ba hakerek Timor-Leste nia istória.

Naroman ba Suku ne’e mós ajuda komunidade no Joven sira iha tempu agora bele utiliza telefone ho di’ak atu bele dezenvolve ida-idak nia-án liu-liu ba informasaun sira ne’e.

Iha Diálogu hanesan iha Aldeia Soiquili, Suku Parlamentu, Prezidente Conselho de Imprensa husu ba ekipa SEKOMS atu bele produs mós Perfil Suku Parlamentu liu-liu Aldeia Soiquili nune’e bele projeta mós ba Nasionál nune’e bele loke sira nia matan tamba to’o agora sidauk hetan Naroman.

Partisipa iha Diálogu Komunitariu ne’ebé organiza hosi SEKOMS, Vice Ministru Obras Publiku, Vice Ministra Solidaridade Sosial no Inkluzaun, Vice Ministru Agrikultura, Reprezentante Administrador Munisipiu Lautem, no Prezidente Conselho de Imprensa rasik. (CI)