Atividade

Previous Next

Conselho de Imprensa Kongratula Aniversáriu Ajénsia Tatoli.IP

Díli – Iha loron 30 Jullu 2021, Ajénsia Nutisioza Tatoli.IP selebra aniversáriu ba dala lima (5) ho tema “hateke ba pasadu, hala’o iha prezente no projeta ba futuru”.

Ejisténsia Tatoli.IP nu’udar ajénsia estadu ida ne’ebé ho nia papel hanesan fonte informasaun ofisiál Estadu Timor-Leste nian ida ne’ebé kredivel. Tatoli.IP hola papél importante hanesan “National Information Clearing House” atu bele kombate misinformasaun, dizinformasaun no malinformasaun ne’ebé la’o hela iha públiku nia leet.

Prezidente Conselho de Imprensa de Timor-Leste (CI), Virgílio da Silva Guterres hato’o parabens ba Ajénsia Nutisioza Tatoli.IP ne’ebé kompleta ona nia mandatu iha tinan lima.

“Ha’u hakarak hato’o parabens ba Tatoli. Hato’o mós mensajen katak kontinua buka hametin ita nia kapasidade hodi serbi públiku,” Prezidente CI Virgílio da Silva Guterres kongratula Tatoli.IP, iha ámbitu komemorasaun aniversáriu tatoli.IP ba dala lima, iha edifísiu Faról, sesta (30/07), liuhusi atividade Kolókiu Públiku ho tema “Papél Tatoli.IP ba susesu eleisaun Prezidensiál iha tinan 2022”.

Aproveita oportunidade, Prezidente Conselho de Imprensa husu mós ba Ministru Asuntu Parlamentar no Komunikasaun Sosiál (MAPKOMS), atu kontinua tau matan ka investe ba Tatoli.IP no Radio Televizaun Timor-Leste, Empreza Públika (RTTL,EP), atu jornalista sira iha ekipamentu ne’ebé sufisiente atu servi partidu hotu-hotu ne’ebé sei partisipa iha festa demokrasia iha tinan 2023 no eleisaun prezidensiál iha tinan 2022.

Tatoli.IP lansa dahuluk iha loron 27 Jullu 2016 nu’udar embriaun no transforma ba Institutu Públiku iha tinan 2017. (CI)