Previous Next

CI Realiza Enkontru Editorial ho Jornalista no Editór husi Plataforma Oioin

Dili - Conselho de Imprensa de Timor-Leste (CI) kontinua realiza sorumutu editoriál hodi aprezenta rezultadu servisu ne’ebé atinje no obstakulu sira Conselho de Imprensa nian ne’ebé hasoru iha tinan 2020 – 2021 no aprezenta mós rezultadu monitorizasaun no analiza hahú Janeiru to’o Abril nomós sira ne’ebé mak hamosu diskusaun maka’as iha públiku iha Maiu e Juñu 2021 no iha sorumutu loron daruak no datoluk foka liu ba Asosiasaun Jornalista sira, Xefe Redasaun, Editór no Jornalista.

Iha enkontru ne’ebé realiza iha sala konferénsia CI, Quintal Boot ne’e, Membru CI, Konselleiru, Expedito Loro Dias Ximenes, esplika objetivu sorumutu katak, “objetivu husi sorumutu ne’e atu hato’o saída mak Conselho de Imprensa atinje durante 2020 – 2021 no atu rona mós hanoin balu, saída mak presiza atu halo servisu hamutuk ho nune’e kna'ar ne’ebé la’o bele hala’o ho di’ak”.

Nune’e mós iha loron datoluk, Membru CI, Konselleiru, Francisco Belo S. Da Costa, subliña objetivu husi sorumutu ne’e ba Jornalista sira, tanba iha loron datoluk foku aprezenta rezultadu servisu ne’ebé atinje no obstakulu sira Conselho de Imprensa nian ne’ebé hasoru iha tinan 2020 – 2021 no rezultadu monitorizasaun no analiza hahú Janeiru to'o Abril nomós sira ne’ebé mak hamosu diskusaun maka’as iha públiku iha Maiu e Juñu 2021 ba Jornalista sira.

“Baibain ami bolu enkontru editorial, loloos halo fulan tolu dala ida, atu aprezenta servisu ne’ebé Conselho halo nomós iha asuntu balu importante, mídia na'in, editór, jornalista sira presiza tau matan hamutuk ho ami mesmu tempu mós nafatin rona konstituente sira nia hanoin, rekomendasaun ruma ne’ebé fó mai Conselho, atu hadi’a buat balu ne’ebé la’o tiha iha tinan ida ne’e", haforsa Diretór Ezekutivu CI, Rigoberto Monteiro.

DE CI ne’e hatutan, “ami foka ba hadi’a mekanizmu regulasaun sira internal, foku ba diagnostiku Lei Komunikasaun Sosiál, tempu di’ak halo diagnostiku, tinan lima ona, Lei Komunikasaun Sosiál komplika buat lubuk ida e mós inkompatibilidade entre dekretu lei kriasaun ho Lei Komunikasaun Sosiál e pois lei ne’e rasik ho lei sira seluk”.

Diretór Diresaun Dezenvolvimentu no Analiza Mídia, Alberico da Costa Junior, aprezenta rezultadu monitorizasaun no analiza hahú Janeiru to'o Abril nomós sira ne’ebé mak hamosu diskusaun maka’as iha públiku iha Maiu e Juñu 2021.

Iha sesaun diskusaun, partisipantes sira dezafia Conselho de Imprensa iha monitoriza obra jornalistiku ne’ebé foka ba asuntu reportajen sensitivu jéneru no rekomenda mós métodu foun ba monitorizasaun no análize mídia.