Díli - Conselho de Imprensa de Timor-Leste (CI) realiza sorumutu editorial hodi aprezenta rezultadu servisu ne’ebé atinje no obstakulu sira Conselho de Imprensa nian ne’ebé hasoru iha tinan 2020 – 2021.
Conselho de Imprensa aprezenta mós rezultadu rejistu órgaun meiu komunikasaun sosiál no direitu resposta.
Sorumutu ne’e hala’o iha salaun konferénsia CI, Quintal Boot no sei la’o durante loron tolu, hahú 23-25/6/2021.
Loron dahuluk enkontru, hala’o hamutuk ho responsavel meiu komunikasaun sosiál ne’ebé ofisiálmente loke husi Membru CI, Konselleiru, Otelio Ote, “enkontru ho jestór sira nomós aban, bainrua, ho jornalista sira no editór sira, importante tebes, para ita bele fahe informasaun ba malu, para saída mak Conselho de Imprensa nian prioridade programa no saída maka jestór mídia sira hakarak sujere ba Conselho de Imprensa atu ita alkansa iha programa sira tuir mai.”
Diretór Ezekutivu CI, Rigoberto Monteiro, iha aprezenta rezultadu servisu ne’ebé atinje no obstakulu sira Conselho de Imprensa nian ne’ebé hasoru iha tinan 2020 – 2021 esplika katak, “kuaze mídia boot mak iha ne’e, Timor Post, GMN, STL, Mídia Estatál rua, Independente, Radio Voz, Neon Metin, loloos ita halo kada trimestral, enkontru editorial sira hanesan ne’e atu nune’e ami upgrade, servisu balun, mudansa balun iha Conselho nia laran ba ita boot sira, tantu mais mós ita boot sira fó feedback depois fó rekomendasaun ruma karik buat ruma ne’ebé ami halo seidauk saida mak ita mehi hanesan ba ita nia dezenvolvimentu mídia iha Timor.”
Oportunidade hanesan, Ofisiál Diresaun Rejistu no Apoiu Juridiku, Fransisco da S. B. Cunha, aprezenta rezultadu rejistu órgaun meiu komunikasaun sosiál no Ofisiál Diresaun Rejistu no Apoiu Juridiku, Antonito dos R. Baptista, aprezenta kona-ba regulamentu direitu resposta.
Sorumutu ne’e taka ho sesaun diskusaun entre responsavel mídia sira ho Membru Ci no Diretór Ezekutivu CI.
Responsavel Mídia sira, preokupa ho reasaun CI ne’ebé konsidera la maximu ba kazu infrasaun sira, preokupa ba implementa sansaun administrativa ka koima katak modelu sansaun koima oinsá mak sei iha no ba infrasaun oinsá, dilema ba legalidade rejistu mídia iha SERVE, CI no ANC, preokupa mós ho kritériu prémiu seidauk definitivu ba mídia maibé define ba jornalista sira de’it, no polémika direitu retifikasaun konsidera públiku seidauk iha koñesimentu kle’an kona-ba regulamentu ne’e, preokupa mós ho publikasaun The Oecussi Post kona-ba kazu Topu-honis.
Membru CI no Diretór Ezekutivu CI responde ho esplika kona-ba prémiu katak CI variabel tratamentu ba konsistensia editorial, kuotasaun publisidade ho notísia, persentajen notísia, wainhira aplika ba prémiu iha regulamentu no mekanizmu award ba mídia, esplika kle’an mós kona-ba mekanizmu interligasaun ba rejistu iha SERVE, CI no ANC liga ho konsekuénsia téknika no konsekuénsia jurídiku, esplika kle’an sansaun koima ne’ebé mídia bele hetan husi Conselho de Imprensa ho ezemplu infrasaun.