Previous Next

Prezidente CI Hola Parte iha Diálogu Komunitária iha Suku Fuat

Lautem - Prezidente Conselho de Imprensa de Timor-Leste (CI), Virgílio da Silva Guterres, partisipa iha enkontru entre Sekretáriu Estadu Komunikasaun Sosiál – SEKOMS, Vise Ministru Agrikultura e Peska, Vise Ministru Justisa ho Administradór Munisípiu Lautem, hodi kumprimenta no introdús atividade “Diálogu Komunitária”, nu’udar parte ida husi programa Sekretáriu Estadu Komunikasaun Sosiál – SEKOMS iha povu nia leet ne’ebé hanaran “Naroman ba Suku”, kinta-feira, 1/7/2021, iha edifísiu administrasaun Munisípiu Lautem.

Iha loron hanesan, Prezidente Conselho de Imprensa de Timor-Leste (CI), Virgílio da Silva Guterres, hola parte iha “Diálogu Komunitária”, iha Sede Suku Fuat, Postu Administrativu Iliomar, Munisípiu Lautem.

Iha Prezidente CI nia diskursu, dezafia foin-sa’e sira atu uza Plataforma digital hanesan internet hodi transmite informasaun ho loos, moos no kredivel, “se bele halo ema barak liután hatene, entende no komprende kona-ba saida mak justisa, entende saida mak moris di’ak, ida ne’e di’ak liután, maibé se informasaun serve de’it ba ita e depois ba de’it ita nia moris, ita la halo tuir ema sira mate sakrifika sira nia an ba rai ida ne’e, ne’ebé dala ida tan agradese ba oportunidade, ba Sekretáriu Estadu, ba katuas sira ha’u lakohi sai mestre tanba sira hanorin barakliu duke ita, ha’u fó hatene de’it ba sira tuir ha’u ne’e, ki’ik tuir ha’u ne’e atu ita sira jerasaun millennial kaer android ne’e, tiktok bele halimar Facebook, WA maibé ba ida di’ak nia ne’e”.

Iha sesaun husu no hatán, foin-sa’e Suku Fuat barak liu husu kona-ba Meiu Komunikasaun Sosiál ne’ebé transmite informasaun la klaru no halo komunidade paniku, oinsá hare ba ida ne’e no sansaun saida ba sira ne’ebé komete infrasaun.

Prezidente CI esplika ho ezemplu sira katak, “Jornalista tenke halo kobertura ne’ebé balansu katak Antonio ho Joao baku malu, Jornalista tenke entrevista Antonio ho Joao atu fó opiniaun hanesan, se iha televizaun Antonio ko’alia direitamente entaun Joao mós tenke ko’alia direitamente, labele Joao ko’alia direitamente, Antonio nia Jornalista mak ko’alia fali halo narativa, ne’e étika balu ami Regula kona-ba ida ne’e, étika ne’e atu hanesan katuas sira ko’alia fetosan umane, oinsá ko’alia ba fetosan sira, sira iha maneira rasik, atu ko’alia ba umane sira mós, iha maneira rasik, ne’e étika buat ne’ebé sai hanesan manual Jornalista, iha kode étika Jornalista, Jornalista labele subar informasaun labele subar faktu.

Atividade ne’e realiza ho objetivu lori Governu ba komunidade nia leet, hodi komunidade bele hatene programa governu ho kle’an, no Governu rasik rona mós krítika, opiniaun no sujestaun husi komunidade.

Diálogu Komunitária ne’e partisipa husi Prezidente Conselho de Imprensa de Timor-Leste (CI), Virgílio da Silva Guterres, Sekretáriu Estadu Komunikasaun Sosiál – SEKOMS, Vise Ministru Agrikultura e Peska, Vise Ministru Justisa, Administradór Munisípiu Lautem, Autoridade Lokál Postu Administrativu Iliomar no Komunidade Suku Fuat.


Imprimir   Email