Previous Next

CI no UNDP/PNUD Sei Produz Matadalan Reportajen Violénsia Bazeia Ba Jéneru

Dili - Conselho de Imprensa de Timor-Leste (CI), asina akordu kooperasaun ho UNDP/PNUD Timor-Leste atu dezenvolve matadalan ba Jornalista kona-ba violénsia bazeia ba jéneru, iha salaun Konferénsia CI, Quintal Boot, Segunda-feira, 21/6/2021, ho objetivu Jornalista kontribui ba inisiativa atu elimina violénsia kontra feto no labarik feto sira iha sosiedade Timor-Leste.

“Espera katak inisiativa CI no UNDP ida ne’e, bele kontribui ba polítika oitavu Governu ninian ba eliminasaun violénsia kontra feto no labarik feto sira iha ita nia sosiedade,” informa Diretór Ezekutiva CI, Rigoberto Monteiro.

Diretór Ezekutiva CI ne’e hatutan katak, “Consultant, ekipa UNDP, ekipa Conselho de Imprensa, ne’ebé mak direitamente sei hala’o atividade ida ne’e, hakarak enkoraja ita-boot sira atu hala’o ita-boot sira nia knar ho responsabilidade, honestidade no ho espíritu solidariedade ba feto no labarik feto sira, atu nune’e ita bele atinje ita nia metas ba projetu ida ne’e nian, dokumentu ne’ebé ita produz sei util ba atividade jornalista sira nian, sei util ba formasaun jornalista sira nian no mós sei util ba estudante universitáriu sira nian ba peskiza ka estudante komunikasaun sosiál uza atu hatene. Conselho de Imprensa mós dezenvolve mekanizmu atu halo monitoring ba matadalan ida ne’e rasik nune’e bele hatene indikadór sira tinan tuir mai mídia no jornalista sira uza matadalan ne’e ba sira nia atividade ka lae, atu nune’e bele hatene ita nia kontribuisaun ba eliminasaun violénsia kontra feto to’o iha ne’ebé”.

Deputy Resident Representative UNDP/PNUD Timor-Leste, Lazima Onta Bhatta, iha nia diskursu, kontente tanba bele asina akordu servisu hamutuk ho Conselho de Imprensa ba tópiku espesiál no importante, “tinan kotuk halo ona formasaun iha fatin ne’e ba asuntu reportajen sensitivu jéneru ba jornalista barak ne’ebé servisu iha  plataforma diferente, ida ne’e hanesan etapa tuir mai servisu hamutuk ne’ebé foku ba reportajen sensitivu jéneru ne’ebé iha relasaun ba feto no labarik feto sira, ida ne’e sensitivu no tópiku importante tanba ita hatene violénsia doméstika no violénsia bazeia ba jéneru signifikante tebes iha Timor-Leste”.

Prezidente Conselho de Imprensa de Timor-Leste (CI), Virgilio da Silva Guterres, mós esklarese katak, “agradese ba UNDP tanba kontinua fó apoiu atu servisu hamutuk iha issue ida ne’e, issue kona-ba feto no labarik, issue ida ne’ebé boot tebetebes e issue ida ne’ebé nia luta ne’e naruk ladi’ak, tanba ne’e mak kooperasaun ida hanesan ne’e bele ajuda ita atu entende isu kona-ba violénsia hasoru feto no labarik feto”.

Parseiru entre Conselho de Imprensa de Timor-Leste (CI) ho UNDP/PNUD Timor-Leste, hahú la’o iha tinan 2016 to’o agora iha area formasaun ba jornalista no seluk tan. (CI)


Imprimir   Email