Previous Next

NPCT Kongratula Mídia Timor Leste ba Index Liberdade Imprensa

Díli – National Press Council of Thailand (NPCT) kongratula órgaun no meiu komunikasaun sosiál Timor-Leste kona-ba index liberdade imprensa ne’ebé kontinua okupa primeiru lugar iha Rejiaun Sudeste Aziátiku.

NPCT hato’o kongratulasaun ba Timor-Leste bainhira Conselho de Imprensa de Timor-Leste (CI) no National Press Council of Thailand realiza enkontru ofisiál virtual (Zoom meeting), iha Sesta feira, 21/05/2021.

Iha enkontru refere, Conselho de Imprensa de Timor-Leste (CI) ho Conselho de Imprensa Tailandia, ko’alia mós kona-ba situasaun mídia no jornalista nian iha periódu propagasaun COVID – 19 iha país rua ne’e.

Alen ne’e, entidade reguladór país rua ne’e mós ko’alia kona-ba hametin kooperasaun atu hamutuk dezenvolve mídia no garante liberdade imprensa iha Timor-Leste no Tailandia. Ikus-liu parte rua konkorda atu renova no altera konteúdu akordu kooperasaun nian ne’ebé iha ona tuir nesesidade parte rua.

Partisipa iha enkontru liuhusi vertuál, parte Timor-Leste nian maka hanesan Prezidente no membru sira Conselho de Imprensa de Timor-Leste, Diretór Ezekutivu CI no Diretór Dezenvolvimentu no Análize Mídia - CI, Alberico da Costa Junior no parte Tailandia nian maka prezidente no membru sira National Press Council of Thailand.

Iha nível mundiál index liberdade imprensa tinan 2021, Timor-Leste okupa iha pozisaun 71 kompara ho tinan kotuk (2020), país demokrátiku foun ne’e okupa iha pozisaun 78. Atinjimentu ne’e hatudu progresu di’ak kona-ba liberdade imprensa no liberdade espresaun iha Timor-Leste no iha rejiaun.


Imprimir   Email